Türkiyədə “Papara” satışa çıxarılır

Türkiyənin “Əmanətlərin Sığortalanması Fondu” (TMSF) “PPR Holding Anonim Şirkəti”nin törəmə şirkətlərinə aid iştirak paylarının satışı ilə bağlı tender elanı yayımlayıb.

Valyuta.az xəbər verir ki, tender elanına əsasən, “PPR Holding”in 100 faiz iştirak payı satışa çıxarılıb.

Bu tender “Papara” qrupuna daxil olan dörd şirkəti - “Papara Elektron Pul” ASC, “Papara Texnologiya”, “Papara Sığorta Vasitəçilik Xidmətləri” və “Papara Qiymətli Kağızlar”ı əhatə edir.

Satış prosesi qapalı təklif və açıq artırma üsullarının birgə tətbiqi ilə həyata keçiriləcək. Təklif olunan ilkin qiymət 4,27 milyard TL, iştirak üçün tələb olunan təminat məbləği isə 213,5 milyon TL-dir. Şərtlər toplusunun qiyməti 300 min TL, məlumatların incələnməsi və müəssisəyə səfər üçün ödəniş isə 750 min TL olaraq müəyyən edilib.

İnvestorlar 20 yanvar - 6 fevral 2026 tarixləri arasında məlumat incələmə hüququna malik olacaqlar. Son təklif təqdimetmə tarixi 9 fevral 2026, təkliflərin açılması və açıq artırma isə 10 fevral 2026-cı il tarixində baş tutacaq.

Mayya Hüseynova