Trampın İrana dair açıqlamaları neft qiymətlərini yüksəltdi

ABŞ Prezidenti Donald Trampın İrana qarşı mümkün hərbi addımlara işarə edən açıqlamalarından sonra neft qiymətləri artıb. Asiya ticarət sessiyasında baş verən yüksəliş Yaxın Şərqdə neft tədarükü ilə bağlı riskləri yenidən gündəmə gətirib.

Valyuta.az xəbər verir ki, neft qiymətləri ardıcıl beşinci həftəni də artımla başa vurmağa hazırlaşır. Mart ayı üçün Brent markalı neft 0,9% bahalaşaraq 64,62 dollar, WTI markalı xam neft isə 59,89 dollar səviyyəsinə yüksəlib.

Tramp bildirib ki, ABŞ-ın İrana doğru irəliləyən hərbi donanması var və Vaşinqton Tehranın nüvə fəaliyyəti ilə bağlı addımlarını yaxından izləyir. Mediaya görə, ABŞ-a məxsus hərbi gəmilərin yaxın günlərdə Yaxın Şərqə çatması gözlənilir.

Qeyd edək ki, İran OPEC-in əsas neft istehsalçılarından biridir və mümkün hərbi eskalasiya bazarlarda neft təklifi ilə bağlı riskləri artıra bilər.