Niyə ən yaxşı ideyalarınız iclaslarda diqqətdən kənarda qalır?

İş görüşlərində bəzən ən yaxşı ideya belə gözlənilən reaksiyanı almaya bilər. Bu isə çox vaxt ideyanın zəif olmasından deyil, yanlış vaxtda səsləndirilməsindən və ya qrup dinamikasına uyğun gəlməməsindən qaynaqlanır.

Valyuta.az xəbər veriri ki, qrup müzakirələrində haqlı olmaq hər zaman təsirli olmaq demək deyil. Sosial psixologiya və qərarvermə üzrə aparılan tədqiqatlara görə, düzgün ideya belə bəzən diqqətdən kənarda qala bilər.

Niyə yaxşı ideyalar rədd edilir?

Eqo təhdidi

Bir problemi hamıdan əvvəl həll etmək bəzən digər iştirakçıların özünü narahat hiss etməsinə səbəb olur. İnsanlar yalnız nəticəni deyil, həll prosesində iştirak etməyi də istəyirlər. Bu səbəbdən ideya doğru olsa belə, digərləri onu qəbul etməkdə tərəddüd edə bilər.

Məntiq əvəzinə “qısa yollar”

İdeal vəziyyətdə ideyalar məntiq və faktlara görə qiymətləndirilməlidir. Lakin iclaslarda insanlar çox vaxt yorğun və ya tələskən olduqları üçün qərarları tez vermək istəyirlər. Bu zaman kim daha inamlı danışırsa, kim daha çox söz alırsa, onun fikri daha çox diqqət çəkir.

Konsensus (bir qrup insanın ümumi razılığa gəlməsi) rahatlığı

Qruplar adətən tanış və təhlükəsiz görünən fikirlərə üstünlük verirlər. Əgər müzakirənin əvvəlində çox fərqli və yenilikçi ideya təqdim olunarsa, bu, qrupun ümumi ritmini poza bilər və nəticədə ideya qəbul edilməyə bilər.

İdeyanın qəbul olunması üçün nə etmək lazımdır?

Ekspertlər bildirir ki, ideyanın qəbul olunması üçün yalnız faktları təqdim etmək kifayət deyil. Doğru vaxtı seçmək, qrupun dinamikasını nəzərə almaq və ideyanı mərhələli şəkildə təqdim etmək daha effektiv nəticə verə bilər.

Beləliklə, iclaslarda ideyaların uğuru təkcə onların nə qədər doğru olmasından deyil, necə və nə vaxt təqdim olunmasından da asılıdır.

Sərvanə Rəmixanova