2 əsr əvvəl sabun bişirən gəncin biznesi bu gün milyardlar qazandırır - "Colgate" hekayəsi - SƏHƏR OXUSU

Bu gün hamımız "Colgate" diş pastasını və ya "Palmolive" sabununu tanıyırıq. Dünyanın demək olar ki, hər ölkəsində satılan bu məhsullar böyük bir qlobal şirkətin - "Colgate-Palmolive"in brendləridir. Lakin bu nəhəng şirkətin hekayəsi olduqca sadə bir biznesdən başlayıb.

Valyuta.az "Colgate-Palmolive" şirkətinin maraqlı tarixini təqdim edir.

Kiçik sabun biznesi ilə başlayan yol

Şirkətin əsası 1806-cı ildə ingilis əsilli sahibkar William Colgate tərəfindən Nyu-York şəhərində qoyulub. O zaman Colgate kiçik bir fabrikdə sabun, şam və nişasta istehsal edirdi. Şirkət böyük rəqabətə baxmayaraq məhsullarının keyfiyyəti sayəsində qısa müddətdə tanınmağa başladı.

"Colgate"in tarixində ən mühüm dönüş nöqtələrindən biri 1873-cü ildə ilk kütləvi istehsal olunan diş pastasının təqdim edilməsi oldu. Bu yenilik insanların evdə hazırladığı diş tozlarını tədricən əvəz etdi və ağız gigiyenasında yeni standart yaratdı.

Bir neçə onillik sonra - 1896-cı ildə "Colgate" dünyada ilk dəfə qatlanan diş pastası tubunu təqdim etdi. Bu yenilik diş pastasının istifadəsini daha rahat və populyar etdi.

Şirkətin tarixində digər mühüm hadisə 1928-ci ildə "Colgate" ilə "Palmolive-Peet" şirkətlərinin birləşməsi oldu. "Palmolive" sabunu isə palma və zeytun yağlarından hazırlanan məşhur məhsul idi və bazarda böyük uğur qazandı.

Bu birləşmə nəticəsində "Colgate-Palmolive" adlı böyük şirkət yarandı və brend qısa müddətdə beynəlxalq bazarlara çıxmağa başladı.

20-ci əsrdə şirkət fəaliyyətini sürətlə genişləndirərək Kanada, Avropa və Asiya bazarlarına daxil oldu. Sonrakı illərdə isə şirkət yalnız ağız gigiyenası məhsulları ilə kifayətlənməyərək şəxsi qulluq və ev təmizliyi məhsulları bazarında da güclü mövqe qazandı.

Bu gün "Colgate-Palmolive" dünyanın ən böyük istehlak məhsulları şirkətlərindən biri hesab olunur. Şirkətin məlumatına görə, 2024-cü ildə satışları 19,5 milyard dollara çatıb.

Beləliklə, iki əsrdən çox əvvəl sadə sabun istehsalı ilə başlayan biznes bu gün dünyanın ən tanınmış qlobal brendlərindən birinə çevrilib. 

Sərvanə Rəmixanova