Bu şirkət itmiş hava limanı baqajını alıb yenidən satır

Aviaşirkət itirilmiş çantaların sahiblərini tapa bilmədikdə, onları ABŞ-ın Alabama ştatının Skottsboro şəhərində yerləşən "Unclaimed Baggage" şirkətinə satır. Şirkət özünü “ölkədə itmiş baqajların satışı ilə məşğul olan yeganə pərakəndə satışçısı” adlandırır və hər il yayımladığı "Found Report" hesabatında səyahətçilərin təsadüfən geridə qoyduğu əşyaları açıqlayır.

Valyuta.az xəbər verir ki, bu il tapılan ən maraqlı əşyalar arasında samuray qılıncları, 35 min dollar dəyərində "Rolex" saatı, tam yığılmış robot və doldurulmuş maral fiquru var. Ən bahalı tapıntı dəyəri 43 min dollardan çox olan ağ brilyant sırğalar olub. Ən qəribə əşyalar isə siçan zəhəri ilə dolu çamadan, armadillo dərisindən hazırlanmış çanta və 12 ədəd sardina konservi olan paket kimi qeyd olunub.

Yoxlanılan baqajların 99,9 faizi sonda sahiblərinə qaytarılsa da, bəziləri Alabama ştatına göndərilir. Şirkətin baş direktoru Brayan Ouens bildirir ki, onlar artıq 55 ildir “itirilmiş və sahibləri tərəfindən tələb olunmayan əşyaları yenidən dövriyyəyə qaytarmaqla” məşğuldurlar. Şirkət tapılan əşyaların təxminən üçdə birini təkrar emala göndərir, digər üçdə birini xeyriyyə məqsədilə bağışlayır, qalan hissəsini isə onlayn və fiziki mağazasında satışa çıxarır.

Tənzilə Ağabalayeva