“Trendyol Go”dan “Uber Eats”ə transfer

“Trendyol Go”nun həmsədri Mərvə Başçı “Uber Eats”in Birləşmiş Krallıq üzrə əməliyyat rəhbəri vəzifəsinə təyin edilib.

Valyuta.az xəbər verir ki, o, bu vəzifədə çatdırılma əməliyyatları, restoran tərəfdaşları ilə əlaqələr, istifadəçi təcrübəsi və kuryer proseslərinin idarə olunmasına cavabdeh olacaq.

Xatırladaq ki, bu ilin may ayında “Uber”in “Trendyol Go”nu satın alması barədə məlumat yayılmışdı. Sözügedən alışdan sonra şirkət rəhbərliyində mühüm dəyişikliklər baş verib. Mərvə Başçının yeni təyinatı bu dəyişikliklərin ən önəmlilərindəndir.

Başçı, Türkiyədə əldə olunan çatdırılma təcrübəsini Birləşmiş Krallıq bazarına daşımaqdan qürur duyduğunu bildirib. O, yerli komandaların bacarıqlarının “Uber”in qlobal inkişafına töhfə verəcəyinə inandığını qeyd edib.

Mərvə Başçı “Trendyol Go”dakı fəaliyyətindən əvvəl bir sıra beynəlxalq və regional şirkətlərdə rəhbər vəzifələrdə çalışıb. Karyerasına “Coca-Cola”da başlayan Başçı, daha sonra “Unilever”də Avropa, Asiya və Latın Amerikası bazarlarını əhatə edən gəlir idarəetmə layihələrində iştirak edib. Çatdırılma sektoruna isə “Glovo”da hesab menecmenti komandalarına rəhbərlik etməklə daxil olub. O, MBA təhsilini “INSEAD”da, bakalavr təhsilini isə “Sabancı Universiteti”ndə sənaye mühəndisliyi ixtisası üzrə başa vurub.

“Uber” həmçinin bildirib ki, Türkiyə əməliyyatlarına “Trendyol Go-Uber Eats”in həmsədri Ege Atikkan rəhbərlik etməyə davam edəcək. Bu təyinat şirkətin Türkiyəni istedad və innovasiya mərkəzi kimi mövqeləndirmə strategiyasını daha da gücləndirir. Hazırda İstanbulda fəaliyyət göstərən Texnologiya Mərkəzində çalışan mühəndis komandaları “Uber”in çatdırılma və mobillik platformaları üçün qlobal məhsullar hazırlamaqda davam edir.

Mayya Hüseynova