İş axtaranlar deyir: Niyə şirkətlər müsahibəni sabaha yox, bu günə təyin edirlər?

Son dövrlər əmək bazarında tez-tez rast gəlinən hallardan biri də işaxtaran namizədlərin göndərdiyi CV-yə HR mütəxəssislərinin bəzən çox qısa zaman çərçivəsində - hətta eyni gün müsahibəyə dəvət etməsidir. Bu yanaşma bir sıra namizədlər tərəfindən narazılıqla qarşılanır. Onlar hesab edirlər ki, müsahibə üçün ən azı bir gün öncədən xəbərdarlıq edilməlidir. Bəs bu məsələ HR peşəkarlığı baxımından necə qiymətləndirilir?

Rəqəmsal Kadr Agentliyinin İnsan Resursları üzrə meneceri Röyal Əhmədov Valyuta.az-a bildirdi ki, hazırda əmək bazarında vəziyyət kifayət qədər qarışıqdır: "Şirkətlərin paylaşdığı vakansiyalarda tələb olunan meyarlarla namizədlərin göndərdiyi CV-lər arasında ciddi uyğunsuzluqlar mövcuddur. Nəticədə iş axtaran şəxs eyni anda bir çox vakansiyaya müraciət edir. Belə halda hər hansı bir şirkətdən geridönüş aldıqda namizəd zaman məsələsində bunu problem etməməlidir".

Ekspertin sözlərinə görə, əgər namizəd aktiv şəkildə iş axtarır və CV göndərirsə, bu artıq onun təcili axtarışda olduğunu göstərir: "Bu səbəbdən də HR tərəfindən sürətli geridönüşlərin olması əslində müsbət haldır. Çünki əmək bazarında ən çox rast gəlinən narazılıqlardan biri də CV göndərilən şirkətlərdən ümumiyyətlə cavab gəlməməsidir. Belə olan halda sürətli geridönüşün mənfi yox, əksinə, müsbət qarşılanması daha məntiqlidir".

R.Əhmədov qeyd edir ki, bəzi hallarda namizəd müsahibənin növbəti günlərə keçirilməsini xahiş edə bilər: "Məsələn, namizəd regiondadır və ya həmin gün Bakıda deyil. Bu cür hallar başadüşüləndir və HR tərəfindən anlayışla qarşılana bilər. Lakin “məşğulam”, “planlarım var idi”, “öncədən desəydiniz, daha yaxşı olardı” kimi ümumi arqumentlərlə şirkətə qarşı mənfi reaksiya göstərilməsi peşəkar yanaşma hesab edilmir".

Ekspert vurğulayır ki, namizədlər nəzərə almalıdırlar ki, CV göndərilən istənilən şirkətdən geridönüş həm bir neçə saat sonra, həm bir neçə gün sonra, həm də ümumiyyətlə gəlməyə bilər: "Bu, HR mütəxəssislərinin qeyri-peşəkarlığı kimi qiymətləndirilməməlidir. Eyni zamanda əmək bazarında elə şirkətlər var ki, paylaşdıqları elanlar real olmur və məqsədli namizəd axtarışına xidmət edir. Bu səbəbdən göndərilən CV-lərə namizədi itirməmək üçün çox sürətli geridönüş edirlər. Buna görə də iş axtaran şəxslər CV göndərdikləri şirkəti əvvəlcədən araşdırmalı, geridönüşün hansı şirkətdən gələcəyini bilməlidirlər".

"Digər tərəfdən, real və məqsədli namizəd axtarışında olan şirkətlər də uyğun namizədi itirməmək üçün çox sürətli hərəkət edirlər. Tikinti, istehsalat, xidmət sektoru və ya tanınmış brendlər daxil olmaqla bir çox normal və sistemli şirkətlərdə geridönüşlərin sürətli olması həmin təşkilatın HR proseslərinin adekvat işlədiyini göstərir", - deyə ekspert əlavə edir.

R.Əhmədovun fikrincə, namizədlər CV göndərməzdən əvvəl müraciət etdikləri şirkətləri araşdırmalıdırlar: "Hansı şirkətdən, hansı vaxtda geridönüş gələ biləcəyini təxmin etmək bu baxımdan vacibdir. Namizədə sürətli geridönüş edilməsi əmək bazarı üçün müsbət siqnaldır və bu hal narazılıq doğurmamalıdır".

Ekspert həmçinin işaxtaranların tez-tez yol verdiyi səhvlərdən birinə də diqqət çəkir. Onun sözlərinə görə, namizədlər uyğun olub-olmamasından asılı olmayaraq bütün vakansiyalara CV göndərməməlidirlər: "Bu yanaşma effektiv deyil. Bilik və bacarıqlara uyğun vakansiyalara müraciət etmək həm geridönüş ehtimalını artırır, həm də namizəddə “mənə heç kim cavab vermir” kimi yanlış düşüncənin formalaşmasının qarşısını alır".

Nəticə etibarilə, ekspert hesab edir ki, HR tərəfindən eyni gün və ya qısa müddət ərzində müsahibəyə dəvət edilməsi qeyri-peşəkar yanaşma deyil. Əksinə, həm şirkətin təcili işçi axtarması, həm də namizədin təcili iş axtarışında olması bu prosesi şərtləndirir. Bu səbəbdən sürətli geridönüşlərə namizədlərin narazılığı əsaslı hesab edilmir və əmək bazarının mövcud reallıqları çərçivəsində normal qarşılanmalıdır.

Sərvanə Rəmixanova