Texnologiya nəhənglərinin gəliri kəskin artıb - Rəqəmlər açıqlandı

ABŞ texnologiya şirkətlərindən “Microsoft”, “Meta” və IBM-in gəlirləri ötən ilin oktyabr–dekabr dövründə bazar gözləntilərindən yüksək olub.

Valyuta.az xəbər verir ki, maliyyə təqvimində 31 dekabr 2025-də başa çatan üç aylıq dövrü 2026 maliyyə ilinin ikinci rübü kimi qəbul edən “Microsoft” maliyyə hesabatını açıqlayıb.

Buna əsasən, şirkətin gəliri ötən ilin oktyabr–dekabr dövründə illik müqayisədə 17 faiz artaraq 81,3 milyard dollara yüksəlib. “Microsoft” əvvəlki ilin eyni dövründə 69,6 milyard dollar gəlir əldə etmişdi.

Şirkətin xalis mənfəəti də eyni dövrdə təxminən 60 faiz artaraq 38,5 milyard dollara çatıb. Bu göstərici əvvəlki ilin eyni dövründə 24,1 milyard dollar olmuşdu.

Həmin dövrdə səhm başına mənfəət 3,23 dollardan 5,16 dollara yüksəlib. “Microsoft”un gəlir və mənfəəti bazar proqnozlarını üstələyib. Şirkətin “Azure” və digər bulud xidmətlərindən əldə etdiyi gəlir də eyni dövrdə 39 faiz artıb.

"Meta"nın gəliri 24 faiz artıb

“Facebook”, “Instagram” və “WhatsApp” platformalarının sahibi olan “Meta” da ötən ilin dördüncü rübünə dair maliyyə hesabatını yayımlayıb. Hesabata görə, şirkətin 2025-ci ilin son rübündə əldə etdiyi gəlir əvvəlki ilin eyni dövrü ilə müqayisədə 24 faiz artaraq 59,9 milyard dollara yüksəlib. “Meta” 2024-cü ilin eyni dövründə 48,4 milyard dollar gəlir əldə etmişdi.

Şirkətin xalis mənfəəti ötən ilin son rübündə 9 faiz artaraq 22,8 milyard dollara çatıb. Bu göstərici 2024-cü ilin eyni dövründə 20,8 milyard dollar olmuşdu. “Meta”nın 2024-cü ilin dördüncü rübündə 8,02 dollar olan səhm başına mənfəəti ötən ilin eyni dövründə 8,88 dollara yüksəlib.

Şirkətin gəlir və mənfəəti bu dövrdə də bazar gözləntilərini üstələyib. “Meta” 2026-cı ilin birinci rübü üçün 53,5 milyard dollar ilə 56,5 milyard dollar arasında gəlir gözlənildiyini açıqlayıb. Şirkət 2026-cı il üzrə ümumi xərclərin 162 milyard dollar ilə 169 milyard dollar arasında olacağını, artımın əsasən infrastruktur xərclərindən qaynaqlanacağını bildirib.

Şirkətin baş icraçı direktoru Mark Zakerberq maliyyə nəticələrini dəyərləndirərkən 2025-ci ildə güclü performans nümayiş etdirdiklərini qeyd edərək deyib: “2026-cı ildə dünyanın hər yerində insanlar üçün fərdi super zəkanın inkişaf etdirilməsini səbirsizliklə gözləyirəm”.

IBM-in maliyyə nəticələri də gözləntiləri aşdı

Ötən ilin dördüncü rübünə dair maliyyə hesabatını açıqlayan IBM-in gəliri də əvvəlki ilin eyni dövrü ilə müqayisədə 12 faiz artaraq 19,7 milyard dollara yüksəlib. Şirkət 2024-cü ilin eyni dövründə 17,6 milyard dollar gəlir əldə etmişdi.

IBM-in xalis mənfəəti isə ötən ilin son rübündə 91 faiz artaraq 5,6 milyard dollara çatıb. Bu göstərici 2024-cü ilin eyni dövründə 2,9 milyard dollar idi. Şirkətin 2024-cü ilin dördüncü rübündə 3,09 dollar olan səhm başına mənfəəti ötən ilin son rübündə 5,88 dollar təşkil edib.

IBM-in də gəlir və mənfəəti hesabat dövründə bazar gözləntilərindən yüksək olub. IBM-in baş icraçı direktoru Arvind Krişna proqram təminatı sahəsində ikirəqəmli artımla güclü gəlir əldə etdiklərini bildirib. Şirkətin generativ süni intellekt üzrə iş həcminin 12,5 milyard dolları keçdiyini qeyd edən Krişna, 2026-cı ilə yüksək dinamika və güclü mövqelə malik olduqlarını vurğulayıb.

Krişna bu il 5 faizdən çox gəlir artımı və təxminən 1 milyard dollarlıq sərbəst nağd pul axını artımı gözlədiklərini də açıqlayıb.

Paşa Məmmədli