İstintaqa baxmayaraq, bir ildə 11,6 milyard dollar gəlir əldə ediblər

“Deutsche Bank” aparılan bir istintaqa baxmayaraq, 2025-ci il üzrə 9,7 milyard avro (11,6 milyard dollar) məbləğində vergi öncəsi rekord mənfəət əldə etdiyini açıqlayıb.

Valyuta.az xəbər verir ki, Almaniyanın ən böyük bankı olan “Deutsche Bank” yeni çirkli pulların yuyulması ilə bağlı istintaqla üzləşməsinə baxmayaraq, bütün bölmələrinin yaxşı nəticə göstərdiyini və 2025-ci il üçün rekord göstəriciyə imza atdığını bildirib.

AFP-nin məlumatına görə, bu göstərici gəlirlərin mənfi təsirləndiyi 2024-cü illə müqayisədə 84 faiz artım deməkdir. Səhmdarlara aid xalis mənfəət isə 6,1 milyard avro təşkil edib ki, bu da ötən ilin göstəricisindən iki dəfədən çoxdur.

Bankın açıqlamasında bildirilib ki, gəlirlər 7 faiz artaraq 32,1 milyard avroya çatıb.

“Deutsche Bank”ın baş icraçı direktoru Kristian Zevinq açıqlamasında deyib: "2025-ci il üzrə bütün maliyyə hədəflərimizə nail olduq. Bu, strategiyamızın növbəti mərhələsi üçün mümkün olan ən güclü əsas yaradır". 

O, bankın məqsədinin “Avropa çempionu” olmaq olduğunu da əlavə edib.

İnvestisiya bankçılığı və aktivlərin idarə edilməsi daxil olmaqla əsas bölmələrdə mənfəətin əhəmiyyətli dərəcədə artdığı qeyd olunub.

Maliyyə nəticələri prokurorluq və polisin çirkli pulların yuyulması şübhəsi ilə bağlı aparılan istintaq çərçivəsində bankın Frankfurt şəhərindəki baş ofisində və Berlin ofisində axtarışlar aparmasından bir gün sonra açıqlanıb.

"Süddeutsche Zeitung" qəzetinin yazdığına görə, istintaq bankın rusiyalı milyarder iş adamı Roman Abramoviçlə əlaqəli şirkətlərlə həyata keçirdiyi əməliyyatlarda şübhəli fəaliyyətlə bağlıdır. Prokurorlar hazırda istintaq çərçivəsində konkret olaraq kimin hədəf alındığını təsdiqləməyiblər.

Paşa Məmmədli