"Tesla" bu avtomobil modellərinin istehsalını dayandırır - SƏBƏB

"Tesla" 2026-cı ildən etibarən "Model S" və "Model X" avtomobillərinin istehsalını dayandıracaq.

Valyuta.az xəbər verir ki, bu barədə şirkətin baş direktoru İlon Mask son rüblük maliyyə nəticələrinin açıqlandığı iclasda məlumat verib. Bildirilib ki, hər iki modelin son versiyaları növbəti rübdə istehsal olunacaq, mövcud istifadəçilər üçün texniki dəstək isə davam edəcək.

Mask qeyd edib ki, "Tesla"nın gələcək strategiyası otonom texnologiyalar və robotika üzərində qurulub. Bu çərçivədə Fremont zavodundakı istehsal xətti "Optimus" insansı robotları üçün ayrılacaq, "Cybertruck" istehsalı isə "Texas"da davam edəcək.

Qeyd edək ki, 2012-ci ildə təqdim olunan "Model S" və 2015-ci ildə bazara çıxan "Model X" uzun illər "Tesla"nın amiral gəmisi olub. Lakin şirkətin əsas böyüməsi son illərdə "Model 3" və "Model Y" hesabına baş verib. 2026-cı ildə istehsalın dayandırılması, "Tesla"nın ilk inkişaf mərhələsinin də başa çatması kimi qiymətləndirilir.

Sərvanə Rəmixanova