“Sığorta haqları 23% artaraq 1,5 milyard manata çatıb”

Son iki ildə Azərbaycanın sığorta bazarında ödənişlər 57%-ə yaxın, sığorta haqları isə 23% artım nümayiş etdirib.

​Valyuta.az xəbər verir ki, bunu Mərkəzi Bankın sədrinin birinci müavini Əliyar Məmmədyarov XI Azərbaycan Beynəlxalq Sığorta Forumunda deyib.

​Onun sözlərinə görə, sığorta bazarında müşahidə olunan müsbət dinamika rəqəmlərdə də özünü göstərir: “Son iki il ərzində sığorta haqları 23% artaraq 1,5 milyard manata, sığorta ödənişləri isə 57% artaraq 0,9 milyard manata çatıb. Eyni zamanda sektorun aktivləri 18% artaraq 2,1 milyard manata yüksəlib. Sektorun kapital mövqeyi əhəmiyyətli dərəcədə güclənmiş və məcmü kapitalın həcmi requlyativ kapital tələbini iki dəfə üstələyib. Bu göstəricilər sığorta sektorunun sağlam inkişaf trayektoriyasında olduğunu və maliyyə sabitliyinin daha da möhkəmləndiyini nümayiş etdirir”.

O əlavə edib ki, sığortaçılarda yeni idarəetmə modelinin tətbiqinə başlanılıb: “Sığortaçıların idarəetməsində komitələrin vacibliyi artırılıb, müstəqil üzvlərin idarəetmə orqanlarının iştirakı genişləndirilib. Daxili nəzarət və risklərin idarəetmə xətləri formalaşdırılıb. Bu isə sığortaçıların fəaliyyətinin ən yaxşı beynəlxalq təcrübəyə uyğun qurulmasına imkan vermişdir".

Sərvanə Rəmixanova