Mərkəzi Bank uçot faiz dərəcəsini sabit saxlayıb

Azərbaycan Mərkəzi Bankının İdarə Heyəti faiz dəhlizinin bütün parametrlərinin dəyişməz saxlanılması barədə qərar qəbul edib.

Valyuta.az xəbər verir ki, İdarə Heyətinin qərarı ilə uçot dərəcəsi 6.5%, faiz dəhlizinin yuxarı həddi 7.5%, faiz dəhlizinin aşağı həddi isə 5.5% səviyyəsində saxlanılıb.

2026-cı ilin may ayında 12 aylıq inflyasiya 5,6% təşkil edib və baza ssenarisi üzrə proqnoz trayektoriyasına uyğun hərəkət edir.

İllik baza inflyasiyası da 5,6% səviyyəsində qeydə alınıb.

Mərkəzi Bankın məlumatına görə, cari ilin ilk beş ayında valyuta bazarında təklif tələbi üstələyib. Bu dövrdə ölkənin xarici ticarətində 7,2 milyard ABŞ dolları həcmində müsbət saldo formalaşıb, Mərkəzi Bankın valyuta ehtiyatları isə 10,4% artaraq 12,7 milyard ABŞ dollarına çatıb.

Qurum vurğulayıb ki, pul siyasəti alətləri maliyyə bazarlarındakı proseslər və bank sistemindəki likvidlik göstəriciləri nəzərə alınmaqla tətbiq olunur. Təminatsız pul bazarında qısamüddətli faizlər uçot dərəcəsinə yaxın səviyyədə formalaşır.

Mərkəzi Bank həmçinin bildirib ki, cari və növbəti ildə illik inflyasiyanın hədəf diapazonunda qalacağı proqnozu qüvvədədir. Bununla yanaşı, qlobal iqtisadi mühitdə baş verən dəyişikliklər fonunda xarici inflyasiya risklərinin artması ehtimalı mövcuddur.

Qeyd edək ki, faiz dəhlizinin parametrləri ilə bağlı növbəti qərarın ictimaiyyətə açıqlanması və bununla əlaqədar mətbuat konfransının keçirilməsi tarixi dəyişdirilib. Tədbirin əvvəlcədən nəzərdə tutulan 5 avqust 2026-cı il tarixindən 31 iyul 2026-cı il tarixinə keçirilməsi qərara alınıb.