Satış hədəflərinə çatmağa və artımı sürətləndirməyə kömək edəcək 5 məlumat əsaslı strategiya

Rəqəmsal transformasiya şirkətlərin necə və hansı sürətlə inkişaf edə biləcəyini yenidən müəyyənləşdirir. İstər startap, istərsə də artıq formalaşmış biznesə rəhbərlik edin, məlumatlara çıxış və onlardan qərarverici şəxslərə çatmaq üçün strateji şəkildə istifadə etmək gəlirlərin artırılmasına mühüm töhfə verə bilər.

Mütəxəssislər satış fəaliyyətinin məlumat əsaslı idarə olunmasının yeni müştərilər cəlb etməyə, mövcud müştərilərə əlavə məhsul və xidmətlər satmağa, həmçinin gəlir artımını sürətləndirməyə imkan verdiyini bildirirlər.

Məlumat əsaslı satış sistemi qurun

Ekspertlərin fikrincə, məlumatlardan effektiv istifadə etmək üçün ilk növbədə onların toplanması vacibdir. Şirkətlər mövcud müştərilər, potensial alıcılar və satış fəaliyyəti barədə mümkün qədər çox məlumat toplamalıdır.

Bu məqsədlə müştəri münasibətlərinin idarə olunması (CRM) sistemlərinin imkanlarının genişləndirilməsi, üçüncü tərəf məlumat bazalarından istifadə və marketinq avtomatlaşdırma platformalarının tətbiqi tövsiyə edilir.

Məlumatların təhlili şirkətlərə həm yeni satış imkanlarını müəyyənləşdirməyə, həm də mövcud müştərilərə əlavə məhsul və xidmətlər təklif etməyə şərait yaradır.

Hədəf şirkətləri müəyyənləşdirin və fərdiləşdirilmiş mesajlardan istifadə edin

Mütəxəssislər geniş auditoriyaya yönəlmiş marketinq əvəzinə konkret hədəf qruplara fokuslanmağın daha səmərəli olduğunu vurğulayırlar.

Hesab əsaslı marketinq (ABM) yanaşması şirkətlərə potensial müştəriləri müəyyənləşdirməyə və onlara fərdiləşdirilmiş təkliflər göndərməyə imkan verir. Bu zaman şirkətin ölçüsü, fəaliyyət sahəsi, gəliri, coğrafi yerləşməsi və digər demoqrafik göstəricilər nəzərə alınır.

Məsələn, ABŞ-da orta ölçülü tikinti şirkətlərini hədəfləyən sığorta brokeri araşdırma nəticəsində müəyyən edə bilər ki, həmin şirkətlərin hazırkı sığorta təminatında boşluqlar mövcuddur. Bu halda broker həmin çatışmazlıqları vurğulayan fərdiləşdirilmiş elektron məktublar göndərə və şirkət nümayəndələrini xüsusi vebinara dəvət edə bilər.

Məlumata əsaslanan bu yanaşmanın satış uğurunu artırdığı, satış dövrünü qısaltdığı və gəlirlərin daha proqnozlaşdırıla bilən şəkildə artmasına şərait yaratdığı qeyd olunur.

Auditoriyanı anlamaq üçün niyyət məlumatlarından istifadə edin

Niyyət məlumatları (intent data) istehlakçıların hansı məhsul və ya xidmətlə maraqlandıqlarını müəyyən etməyə kömək edir.

Bu məlumatlar istifadəçilərin internetdəki fəaliyyətinin izlənməsi nəticəsində əldə edilir. Açar söz axtarışları, sahə üzrə hesabatların yüklənməsi, müəyyən mövzular üzrə məqalələrin oxunması, rəqib şirkətlərin saytlarına baxış və əlaqəli məzmunla qarşılıqlı əlaqə kimi göstəricilər potensial alış niyyətindən xəbər verir.

Mütəxəssislərin sözlərinə görə, bu məlumatlar şirkətlərə müştərilərlə doğru zamanda əlaqə qurmağa və daha təsirli marketinq mesajları hazırlamağa imkan yaradır.

Mesajları qərarverici şəxslərin roluna uyğunlaşdırın

Şirkət rəhbərlərinin məhsul və xidmətlərin alınmasına yanaşmaları və prioritetləri vəzifələrindən asılı olaraq fərqlənir.

Baş icraçı direktorlar (CEO), əməliyyat direktoru (COO), maliyyə direktoru (CFO), marketinq direktoru (CMO) və texnologiya direktoru (CTO) müxtəlif məsələlərə üstünlük verirlər. Bəziləri xərclərin azaldılmasına, digərləri isə innovasiya və genişlənmə imkanlarına diqqət yetirirlər.

Bu səbəbdən ekspertlər sorğu nəticələri, CRM məlumatları və sənaye göstəricilərindən istifadə etməklə hər bir rəhbər vəzifə üçün ayrıca profil hazırlanmasını tövsiyə edirlər.

Məsələn, istehsal sektorunda fəaliyyət göstərən orta ölçülü şirkətləri hədəfləyən proqram təminatı şirkəti maliyyə direktoruna xərclərin azaldılması barədə nümunə araşdırması, texnologiya direktoruna texniki uyğunluq və bulud təhlükəsizliyi ilə bağlı məlumat, əməliyyat direktoruna isə istehsal proseslərinin optimallaşdırılması barədə ətraflı hesabat göndərə bilər.

Müxtəlif platformalarda əlaqələndirilmiş fəaliyyət göstərin

Mütəxəssislər şirkətlərin elektron poçt, rəqəmsal reklam, sosial media, tədbirlər və birbaşa satış kimi müxtəlif kanallardan vahid strategiya çərçivəsində istifadə etmələrinin vacibliyini qeyd edirlər.

Bu yanaşma CRM sistemləri, marketinq avtomatlaşdırma alətləri, veb-analitika platformaları, niyyət məlumatı təminatçıları və sosial media göstəricilərinin vahid məlumat bazasında birləşdirilməsi ilə mümkün olur.

Belə inteqrasiya sayəsində şirkətlər müştərilərin davranışlarını daha dəqiq izləyə, alış siqnallarını vaxtında müəyyənləşdirə və marketinq ilə satış komandalarının koordinasiyasını gücləndirə bilirlər.

Mütəxəssislərin fikrincə, çoxkanallı (omnichannel) yanaşma müştəri münasibətlərini gücləndirir, dönüşüm göstəricilərini artırır və satış prosesini sürətləndirir.

Tənzilə Ağabalayeva