“Rafaello” brendinin qısa tarixi - SƏHƏR OXUSU

İtalyan Ferrero şirkətinin məşhur məhsulu olan “Rafaello” pralini bu gün dünyanın ən tanınmış şirniyyatlarından biridir. Süd kremi, hind qozu ləpələri və içində gizlənən fındıq nüvəsi ilə seçilən bu ağ konfetlər, milyonlarla insan üçün həm gündəlik şirin zövq, həm də hədiyyə simvoluna çevrilib.

Valyuta.az xəbər verir ki, "Ferrero" şirkətinin əsası XX əsrin birinci yarısında Pietro Ferrero tərəfindən qoyulub. 1946-cı ildə o, Pyer Ciliaro ilə birlikdə İtaliyanın Alba şəhərində kiçik bir kafe açaraq özünün orijinal reseptlərini təqdim edib. Tezliklə həmin kafenin şöhrətini onun laboratoriyada hazırladığı şirniyyatlar üstələyib və Ferrero ailəsi bütün gücünü konfet istehsalına yönəldib.

Pietro Ferrero 1949-cu ildə vəfat etsə də, onun başladığı işi oğulları Michel və Giovanni davam etdirib. Onlar 1950-ci illərdə yeni məhsullar təqdim edərək "Ferrero"nu təkcə İtaliyada deyil, Avropanın digər ölkələrində də məşhurlaşdırıblar. 1956-cı ildə Almaniyada ilk xarici filial açılıb, ardınca Fransa, Belçika, Hollandiya, Lüksemburq, Danimarka, İsveç, İsveçrə və Böyük Britaniyada şirkətin nümayəndəlikləri fəaliyyətə başlayıb.

“Rafaello”nun isə dünya bazarına çıxışı 1990-cı ilə təsadüf edir. Bu vaxtadək “Nutella” və “Ferrero Rocher” kimi məhsulları ilə məşhurlaşan şirkət, hind qozlu və kremli dadı ilə seçilən “Rafaello”nu qısa zamanda özünün əsas brendlərindən birinə çevirdi.

“Rafaello” adı da təsadüfən seçilməyib. O, İtaliyanın məşhur rəssamı Rafaello Santinin adını daşıyır və brendə incəsənətin zəriflik və harmoniyasını əks etdirməklə yanaşı, ona lüks imic qazandırır.

Ən uğurlu bazarlardan biri isə Rusiya olub. 2009-cu ildə “Rafaello” ölkədə “Brend №1” seçilərək səsvermədə 39% göstərici toplayıb. 2010-cu ildən etibarən Volodimir vilayətinin Vorşa kəndində “Rafaello” istehsal edən zavod fəaliyyətə başlayıb. Dünyanın ən böyük fabriki hesab olunan bu müəssisə hər il 8 min tonadək məhsul istehsal edir. Burada istehsal olunan konfetlər təkcə Rusiya bazarına deyil, həm də Braziliya və Polşa kimi xarici bazarlara göndərilir.

Bu gün “Rafaello” sadəcə şirniyyat deyil, qlobal miqyasda tanınan və sevilən brenddir. Onun uğur hekayəsi həm Ferrero ailəsinin uzun illər öncə qoyduğu təmələ, həm də məhsulun özünəməxsus dadına bağlıdır.

Sərvanə Rəmixanova