"International Leasing" 1 milyon borca girir - Təminat da verilmir

Lizinq şirkəti "International Leasing" ASC 1 milyon manat borca girir. 

Valyuta.az xəbər verir ki, Bakı Fond Birjası lizinq şirkətinin istiqrazlarının ticarətinə icazə qərarı verib. 

Dövlət qeydiyyat nömrəsi – İSİN: AZ2001023236 olan istiqrazların buraxılış həcmi 1000 ədəd, ilkin buraxılış qiyməti isə 1000 manatdır. Ümumi həcmi 1 milyon manat təşkil edən istiqrazlar üzrə gəlirlilik 18% təklif edilir. 

Faizli, sənədsiz, adlı istiqrazlar üzrə gəlirlilik yüksək olsa da, hər hansı bir təminat verilmir. 
2 il tədavüldə olması planlaşdırılan istiqrazlar üzrə kupon ödənişi ilk istiqrazın yerləşdirildiyi tarixdən etibarən ayda bir dəfə həyata keçiriləcək.  

İstiqrazların yerləşdirilməsi üzrə anderrayter “Capital Partners İ.Ş.” QSC-dir. 
Qeyd edək ki, "İnternational Leasing"in nizamnamə kapitalının 45%-i (450 min manatı) Nicat Həsənova, digər 45%-i (450 min manatı) Rifat Həsənova və 10%-i (100 min manatı) Leyla Cabbarovaya məxsusdur. Həsənov Rifat Vaqif oğlu "International" Bank Olmayan Kredit Təşkilatının Müşahidə Şurasının sədri, Həsənov Nicat Vaqif oğlu isə Təşkilatın İdarə Heyətinin sədridir. "BOKT International" QSC-nin 100%-i Həsənov Rifat Vaqif oğluna məxsusdur.

Nara