“Oxa” 103 milyon dollar investisiya alıb

Böyük Britaniyada yerləşən otonom sürüş texnologiyaları startapı “Oxa” 103 milyon dollar investisiya cəlb edib.

Valyuta.az xəbər verir ki, 2014-cü ildə təsis edilən “Oxa” bu günə qədər ümumilikdə 250 milyon dollardan artıq investisiya cəlb edib.

Şirkət bildirib ki, yeni vəsait sənaye sahələrində otonom nəqliyyat texnologiyalarının tətbiqinin genişləndirilməsinə və “DHL”, “BP” və “Vantec” kimi müştərilərlə əməliyyatların miqyasının artırılmasına yönəldiləcək.

“Oxa” Pol Nyuman (Paul Newman) və İnqmar Pozner (Ingmar Posner) tərəfindən yaradılıb. Şirkət sənaye sahələrində istifadə olunan nəqliyyat vasitələrini sürücüsüz hala gətirən otonom sürüş texnologiyaları hazırlayır.

Startap robotaksi və ya minik avtomobillərinə deyil, limanlar, hava limanları, anbarlar və logistika mərkəzləri kimi nəzarət olunan mühitlərdə fəaliyyət göstərən ağır xidmət nəqliyyat vasitələrinə fokuslanır.

“Oxa”nın sistemləri kameralar, radar və lidar kimi sensorlardan gələn məlumatları emal edən süni intellekt əsaslı proqram təminatı və bu proqramın nəqliyyat vasitəsində işləməsini təmin edən aparat inteqrasiyasından ibarətdir. Bu yanaşma, məsələn, liman yük maşınları kimi iri nəqliyyat vasitələrinin qısa müddətdə otonom rejimə keçirilməsinə imkan yaradır. 

Mayya Hüseynova