Mühəndislik işini tərk edib, qlobal media brendi qurdu - SƏHƏR OXUSU

Nuseyr Yasin (Nuseir Yassin) İsraildə ərəb ailəsində böyüyüb. O, Harvard Universitetində iqtisadiyyat və kompüter elmləri üzrə təhsil alıb.

Valyuta.az xəbər verir ki, Universiteti bitirdikdən sonra ABŞ-da “Venmo” şirkətində proqram mühəndisi kimi işləməyə başlayıb. Həmin dövrdə texnologiya sektorunda yüksək maaşlı və sabit işi var idi.

Lakin bir müddət sonra o, korporativ həyatın özünü tam qane etmədiyini hiss etdiyini bildirib. Nuseyr Yasin sonradan müsahibələrində qeyd edib ki, həyatını daha fərqli keçirmək və insanlara real hekayələr göstərmək istəyirdi. Buna görə mühəndislik işindən ayrılmağa qərar verib.

2016-cı ildə o, “Nas Daily” layihəsinə başlayıb. Layihənin əsas ideyası hər gün cəmi bir dəqiqəlik video hazırlamaq idi. O, dünyanın müxtəlif ölkələrinə səyahət edir, insan hekayələri, fərqli mədəniyyətlər və maraqlı mövzular haqqında videolar çəkirdi. “Nas” sözü ərəb dilində “insanlar” mənasını verir.

Başlanğıcda layihə kiçik auditoriyaya malik idi. Lakin qısa, sürətli və emosional videolar sosial mediada sürətlə yayılmağa başladı. Nuseyr Yasin bir neçə il ərzində yüzlərlə video paylaşdı və fərqli ölkələrdən milyonlarla izləyici topladı.

Sonradan “Nas Daily” təkcə sosial media səhifəsi kimi qalmadı. Layihə media və kontent biznesinə çevrildi. Şirkət müxtəlif platformalar, təhsil layihələri və kontent istehsalı istiqamətində fəaliyyətini genişləndirdi.

Nuseyr Yasin xarici mediaya verdiyi müsahibələrdə dəfələrlə bildirib ki, onun əsas məqsədi insanlara dünyanı fərqli tərəfdən göstərmək idi. O, gündəlik bir dəqiqəlik videoları ilə şəxsi layihəni qlobal media brendinə çevirməyi bacardı.

Mayya Hüseynova