Trampın "heç kimin bilmədiyi" neft sirri nədir?

ABŞ-da illik inflyasiya 4,2 faizə yüksələrkən, Prezident Donald Trampın açıqlamaları müzakirələrə səbəb olub. 

Valyuta.az xəbər verir ki, Tramp "inflyasiyanı sevirəm" deyərək ABŞ-ın milyonlarla barel neft hasil etdiyini və İranın radar sistemlərinin sıradan çıxarıldığını iddia edib. Lakin ABŞ-ın energetika naziri Kris Rayt bu iddialarla bağlı məlumata malik olmadığını bildirib.

ABŞ-da son illərin ən yüksək inflyasiya göstəricilərindən biri qeydə alınıb. İllik inflyasiya səviyyəsinin 4,2 faiz olduğu ölkədə Donald Tramp Ağ Evdə jurnalistlərə açıqlamasında diqqətçəkən fikirlər səsləndirib.

Tramp inflyasiya ilə bağlı danışarkən deyib: "İnflyasiyanı sevirəm. Bilirsiniz niyə? Çünki bu müharibə bitən kimi artıq bunu deyə bilərəm. İndiyədək bilmədiyiniz bir şey var. Bilirsinizmi, biz milyonlarla barel neft çıxarırıq. Bunu heç kim bilmir".

ABŞ Prezidenti enerji qiymətlərində mümkün eniş gözləntilərini ölkəsinin bölgədə həyata keçirdiyi hərbi fəaliyyətlərlə əlaqələndirib. Tramp çıxışında ABŞ-ın bölgədə gizli əməliyyatlar keçirdiyinə işarə edərək bildirib:

"Bilirsiniz bunu kim bilmir? İran. Ötən gecə gec saatlarda işıqsız şəkildə 22 gəmini batırdıq, çünki onların heç bir radar sistemi yoxdur. Çünki biz onların radarlarını darmadağın etdik".

Bu açıqlamalar Vaşinqtonda yeni müzakirələrə səbəb açıb.

Trampın neft hasilatı və əməliyyatlarla bağlı səsləndirdiyi iddialar ABŞ-ın energetika naziri Kris Rayta da ünvanlanıb. Nazir suala qısa cavab verərək bildirib: "Bu barədə məlumatım yoxdur".

Digər tərəfdən, ABŞ-da yüksələn inflyasiya əhali arasında ciddi narahatlıq doğurur. Xüsusilə Hörmüz boğazının tam bağlanması fonunda neft qiymətlərinin artdığı qeyd edilir.

Trampın inflyasiya ilə bağlı nisbətən rahat mövqeyi qarşıdan gələn aralıq seçkilər ərəfəsində yalnız müxalifətin deyil, həmçinin Respublikaçılar Partiyası daxilində bəzi dairələrin də diqqətini cəlb edir.

Paşa Məmmədli