"Volkswagen" Almaniyada 19 min iş yerini ixtisar edəcək

Almaniyanın ən böyük avtomobil istehsalçılarından olan "Volkswagen" ölkədəki işçi sayını azaltmağa davam edir. 

Valyuta.az xəbər verir ki, şirkət 2026-cı ilin sonunadək Almaniyada daha 19 min iş yerini ixtisar etməyi planlaşdırır.

Bu barədə "Volkswagen"in baş icraçı direktoru Oliver Blume iyunun 18-də keçiriləcək illik səhmdarlar yığıncağında məlumat verəcək.

Məlumata görə, avtomobil nəhəngi 2030-cu ilədək ümumilikdə 28 mindən çox iş yerinin ləğv edilməsini nəzərdə tutan hədəf müəyyənləşdirib.

Oliver Blume səhmdarlar üçün hazırladığı çıxış mətnində bildirib ki, şirkət Almaniyadakı zavodlarında istehsal xərclərinin azaldılması istiqamətində də addımlar atır. Onun sözlərinə görə, 2025-ci il ərzində ölkədəki müəssisələrdə zavod xərcləri 20%-dən çox azaldılıb.

"Volkswagen" son illərdə elektrik avtomobillərinə keçid, artan rəqabət və avtomobil bazarındakı dəyişikliklər fonunda fəaliyyətini optimallaşdırmaq və xərcləri azaltmaq istiqamətində bir sıra tədbirlər həyata keçirir.