Yarım milyard dollar gəlir azalmasına görə 1000 işçini ixtisar edəcəklər

"Microsoft"un tərkibində fəaliyyət göstərən "Xbox" oyun bölməsi gələn ay genişmiqyaslı ixtisarlarla üzləşəcək. 

Valyuta.az xəbər verir ki, "The Verge" bu barədə şirkətin planları ilə tanış mənbələrə istinadən yayıb.

Bildirilir ki, ixtisarların hazırlanması korporasiya daxilində bir neçə həftədir davam edir. Xbox rəhbəri Aşa Şarma daha əvvəl əməkdaşlara “çətin qərarlar”ın qaçılmaz olduğunu bildirib. Mənbələrin ehtimalına görə, dəyişikliklər oyun studiyalarının strukturuna da təsir edə və bəzi bölmələrin bağlanmasına gətirib çıxara bilər. Daha əvvəl mediada "Xbox" üzrə təxminən 1000 işçinin ixtisar olunacağı barədə məlumatlar yayılmışdı.

“The Verge” qeyd edir ki, "Xbox" rəhbərliyi əməkdaşlara göndərdiyi daxili memorandumda şirkətin yaxın 100 gün üçün “Xbox"un yenidən qurulması proqramına başladığını açıqlayıb. Sənəddə göstərilir ki, son 5 ildə şirkət kontent, platforma və avadanlıq subsidiyaları üçün 20 milyard dollardan çox investisiya yatırıb, lakin bu dövrdə illik gəlir təxminən 500 milyon dollar azalıb.

Bundan əlavə, biznes üçün əsas çətinliklərdən biri kimi aparat istehsal xərclərinin kəskin artması göstərilir. Şirkətin qiymətləndirməsinə görə, 2027-ci ilin bayram mövsümünə qədər komponentlərin dəyəri iki il əvvələ nisbətən beş dəfədən çox artacaq. Yaddaş çipləri üzrə xərclərdə də oxşar artım müşahidə olunur.

"Xbox" rəhbərliyi yeni biznes modelinin və aparat sahəsində tərəfdaşlıqların axtarılacağını, həmçinin mövcud infrastrukturun modernləşdiriləcəyini bildirib. Şirkət oyun cihazları, PC, mobil platformalar və bulud axın xidmətləri istiqamətlərinin inkişafını davam etdirməyi planlaşdırır.

Paşa Məmmədli