Öz vəsaiti hesabına ipoteka krediti verən banklar - ŞƏRTLƏR

Azərbaycanda fəaliyyət göstərən bir sıra banklar vətəndaşlara daxili ipoteka kreditləri təklif edir.

Valyuta.az-ın araşdırmasına əsasən, ABB, Kapital Bank, Xalq Bank və Ziraat Bank Azərbaycan öz vəsaitləri hesabına ipoteka kreditləri təqdim edən banklar sırasındadır.

Bankların daxili ipoteka məhsulları üzrə kredit şərtləri bankdan banka dəyişir. Kreditin maksimal məbləği, faiz dərəcəsi, ilkin ödəniş tələbi və müddəti hər bir bankın daxili qaydalarına uyğun müəyyən edilir.

Bununla yanaşı, AFB Bank partnyor tikinti şirkətlərindən alınan daşınmaz əmlakın maliyyələşdirilməsi məqsədilə ipoteka krediti təqdim edir. Bu məhsul bankın öz vəsaiti hesabına maliyyələşdirildiyi üçün daxili ipoteka məhsullarına yaxın hesab olunur. AFB Bankın təklif etdiyi məhsul üzrə kredit məbləği minimum 20 min manatdan başlayır və Azərbaycan manatı ilə verilir. Kreditin illik faiz dərəcəsi 8%, müddəti isə 36 ayadək müəyyən edilib. Daşınmaz əmlakın alınması zamanı minimum ilkin ödəniş məbləği əmlakın dəyərinin 30%-ni təşkil edir.

Qeyd edək ki, dövlət ipoteka kreditləri də bir çox bank vasitəsilə vətəndaşlara təqdim olunur. Dövlət ipotekası üzrə kredit məbləği 150 min manatadək təşkil edir. Bu kreditlər üzrə illik faiz dərəcəsi 8%, ilkin ödəniş isə adətən 20-30% səviyyəsində müəyyən edilir. Kreditin müddəti isə şərtlərdən asılı olaraq 25 il və ya 30 ilədək ola bilər.

Qeyd: Ziraat Bank Azərbaycan-da redit məbləği AZN valyutası ilə alınan əmlakın ekspert dəyərinin maksimum 70%-dək müəyyən olunur. 

Mayya Hüseynova