"Ayan Capital" 1 milyon dollar investisiya cəlb edib

Özbəkistanın vençur fondu olan “IT Park Ventures” Böyük Britaniyada fəaliyyət göstərən islam maliyyə texnologiyaları (FinTech) startapı “Ayan Capital”ın 4 milyon dollarlıq investisiya raundunda iştirak edərək 1 milyon dollar sərmayə yatırıb.

Valyuta.az xəbər verir ki, cəlb olunan vəsait şirkətin texnoloji həllərinin inkişafına, süni intellekt əsaslı skoring və anderraytinq sistemlərinin təkmilləşdirilməsinə, həmçinin Özbəkistandakı proqram təminatı komandalarının genişləndirilməsinə yönəldiləcək.

Londonda yerləşən “Ayan Capital” Mərkəzi Asiyanın aparıcı "FinTech" şirkətlərindən biri olan “Alif”in həmtəsisçiləri Abdulla Qurbanov, Firdavs Mirzoyev və Zuxurşo Rahmatulloyev tərəfindən yaradılıb. Şirkət hazırda Böyük Britaniyada tam rəqəmsal halal avtomobil maliyyələşdirilməsi xidmətləri təqdim edir və “Ayan Pay”, debet kartları, islam əmanətləri kimi yeni maliyyə məhsulları üzərində çalışır.

“Ayan Capital”ın uzunmüddətli hədəfi Böyük Britaniyada tamhüquqlu rəqəmsal islam bankına çevrilməkdir. Şirkət artıq bank lisenziyası almaq və ölkədə ən böyük islam maliyyə ekosistemlərindən birini qurmaq planlarını açıqlayıb.

“IT Park Ventures”un direktoru Dalerxon Nadirov bildirib ki, fond qlobal bazarlarda böyümə potensialına malik və eyni zamanda Özbəkistanda güclü texnologiya komandaları formalaşdıran startaplara üstünlük verir.

“Ayan Capital”a investisiya fondun beynəlxalq portfelini genişləndirir və Özbəkistanın texnoloji ekosisteminin inkişafına yönəlmiş strategiyasını gücləndirir.

Mayya Hüseynova