7 mlrd. dollar qiymətləndirmə ilə 1,4 mlrd. dollar investisiya aldı

İnsansı robotlar hazırlayan Almaniyanın “Neura Robotics” şirkəti C seriyası investisiya turunda 1,4 milyard dollar vəsait cəlb edib.

Valyuta.az xəbər verir ki, şirkətin 1,4 milyard dollarlıq investisiya turunda “Tether”, “Qualcomm”, “Amazon”, “Nvidia”, “Bosch”, “Schaeffler” və Avropa İnvestisiya Bankı iştirak edib.

Bu investisiyadan sonra “Neura Robotics”in bazar dəyəri təxminən 7 milyard dollara yüksəlib.

2019-cu ildə təsis olunan şirkət bildirib ki, cəlb edilən vəsait insansı robotların və süni intellekt əsaslı robot platformasının inkişafının sürətləndirilməsinə, istehsal gücünün artırılmasına və qlobal genişlənmənin dəstəklənməsinə yönəldiləcək.

David Reger tərəfindən yaradılan “Neura Robotics” süni intellekt dəstəkli insansı və koqnitiv robotlar hazırlayır. Şirkət ənənəvi sənaye robotlarından fərqli olaraq, ətraf mühiti qavraya bilən, insanlarla təhlükəsiz şəkildə əməkdaşlıq edən, təcrübələrindən öyrənən və müxtəlif tapşırıqları yerinə yetirən robotlar istehsal etməyi hədəfləyir.

“Neura Robotics” hazırladığı insansı robotların istehsalat, logistika, səhiyyə və gələcəkdə ev mühitində istifadəsini nəzərdə tutur. Şirkətin ən diqqətçəkən məhsullarından biri insan formasında dizayn edilmiş “4NE1” adlı insansı robotdur. Bununla yanaşı, şirkət fabriklərdə insanlarla birgə işləyə bilən robot qolları, mobil robotlar və fərdi köməkçi robotlar da hazırlayır.

Mayya Hüseynova