Baffetin varisi portfeli yenidən qurdu: aktivlərin 61%-i 5 səhmdə

ABŞ-ın çoxşaxəli investisiya holdinqi olan "Berkshire Hathaway" üçün son bir il diqqətçəkən dəyişikliklərlə yadda qalıb. Bu proses uzun illər şirkətə rəhbərlik etmiş baş icraçı direktor Varren Baffetin 31 dekabr tarixində vəzifəsindən ayrılması ilə başlayıb. Baffet direktorlar şurasının sədri olaraq qalsa da, Omaha kahini kimi tanınan investorun yaratdığı və bazar dəyəri 1 trilyon dolları ötən konqlomerat yarım əsrdən çox müddətdən sonra ilk dəfə yeni rəhbərə sahib olub. Şirkətin idarəçiliyini Qreq Abel üzərinə götürüb.

Mayın 15-də rüblük 13F hesabatlarının tənzimləyici qurumlara təqdim edilməsindən sonra Uoll-Strit və investorlar öyrəniblər ki, Abel "Berkshire Hathaway"in 330 milyard dollarlıq investisiya portfelində genişmiqyaslı dəyişikliklər həyata keçirib.

Ümumilikdə 16 investisiya mövqeyi portfeldən çıxarılıb ki, bu da Baffetin baş direktor kimi son rübündə nəzarət etdiyi aktivlərin təxminən üçdəbirinə bərabərdir.

Hazırda Varren Baffetin varisinin idarə etdiyi portfel yüksək dərəcədə konsentrasiya olunub. Şirkətin investisiya edilmiş aktivlərinin 61%-i cəmi beş səhmdə cəmləşib. Bu şirkətlərdən biri isə faktiki olaraq monopol mövqeyə malikdir.

"Apple" — 71,1 milyard dollar (investisiya edilmiş aktivlərin 21,6%-i)

Uzun illərdir olduğu kimi, "Apple" (NASDAQ: AAPL) bazar dəyərinə görə "Berkshire Hathaway"in ən böyük investisiyası olaraq qalır. Varren Baffet təqaüdə çıxmazdan əvvəlki doqquz rüb ərzində şirkətin "Apple"dakı payının 75%-ni satmasına baxmayaraq, bu investisiya hələ də portfelin təxminən 22%-ni təşkil edir.

Qreq Abel səhmdarlara ünvanladığı ilk illik məktubunda "Apple"ı bir neçə digər şirkətlə birlikdə uzunmüddətli dəyər yaradan investisiya kimi xarakterizə edib. Şirkətin qiymət-qazanc nisbəti hazırda 38 səviyyəsində olsa da və tarixi göstəricilərlə müqayisədə yüksək qiymətləndirilsə də, Abelin məktubu "Apple" səhmlərinin uzun müddət portfeldə qalacağını göstərir.

Baffetin "Apple"da ən çox bəyəndiyi məqam şirkətin genişmiqyaslı səhm geri alış proqramı hesab olunurdu. Şirkət 2013-cü ildən bəri təxminən 853 milyard dollar xərcləyərək dövriyyədəki səhmlərin sayını 44%-dən çox azaldıb və bu da hər səhmə düşən mənfəətin artmasına mühüm töhfə verib.

Abelin isə "Apple"a marağının əsas səbəblərindən biri süni intellekt inteqrasiyası ola bilər. "Apple Intelligence" texnologiyasının "iPhone", "iPad" və "Mac" cihazlarına inteqrasiyası satışları artırmaqla yanaşı, müştəri loyallığını da daha da gücləndirə bilər.

"American Express" — 48 milyard dollar (14,6%)

Qreq Abel rəhbərliyi qəbul edərkən bir sıra məsələlərdə Baffetin strategiyasını davam etdirəcəyini bildirib. Bunlardan biri də Baffetin "müddətsiz saxlanılacaq investisiyalar" adlandırdığı şirkətlərə toxunmamaqdır. 1991-ci ildən etibarən portfeldə yer alan "American Express" (NYSE: AXP) həmin investisiyalardan biridir.

Şirkətin biznes modelinin əsas üstünlüyü ödəniş sisteminin hər iki tərəfində gəlir əldə etməsidir. ABŞ-da kredit kartı əməliyyatlarının həcminə görə üçüncü ən böyük ödəniş prosessoru olan "American Express" tacirlərdən komissiya gəlirləri əldə etməklə yanaşı, kredit verən qurum kimi də fəaliyyət göstərir. Fərdi və korporativ kredit kartları şirkətə illik xidmət haqları və faiz gəlirləri qazandırır.

Şirkət eyni zamanda yüksək gəlirli müştəriləri cəlb etmək bacarığı ilə seçilir. Maddi vəziyyəti yaxşı olan şəxslər iqtisadi çətinliklər zamanı xərcləmə vərdişlərini dəyişməyə və ya ödənişləri gecikdirməyə daha az meyilli olurlar.

Bu investisiyanın ən diqqətçəkən tərəflərindən biri isə gəlirlilik göstəricisidir. "American Express"in hər səhm üzrə illik 3,80 dollarlıq dividendi və "Berkshire Hathaway"in təxminən 8,49 dollarlıq alış qiyməti nəzərə alındıqda, investisiyanın ilkin dəyərinə görə dividend gəlirliliyi təxminən 45% təşkil edir.

"Coca-Cola" — 31,6 milyard dollar (9,6%)

Baffetin "müddətsiz investisiya" kimi qiymətləndirdiyi digər şirkət "Coca-Cola"dır (NYSE: KO). 1988-ci ildən bəri portfeldə yer alan bu şirkət "Berkshire Hathaway"in ən uzunmüddətli investisiyasıdır.

"Coca-Cola" coğrafi əhatə baxımından demək olar ki, rəqibsizdir. Şirkət Şimali Koreya, Kuba və Rusiya istisna olmaqla dünyanın bütün ölkələrində fəaliyyət göstərir. Bu isə inkişaf etməkdə olan bazarlarda üzvi böyümə imkanlarından yararlanmağa, inkişaf etmiş bazarlarda isə sabit pul axını əldə etməyə imkan verir.

Şirkət müştərilərlə əlaqə qurmaq sahəsində də uğurlu nəticələr göstərib. Yüz ildən artıq tarixə malik olması daha yaşlı auditoriya ilə əlaqəni gücləndirir, süni intellekt əsaslı reklamlar isə gənc istehlakçılar üçün fərdiləşdirilmiş mesajlar təqdim etməyə şərait yaradır.

"Coca-Cola" dividend siyasəti ilə də seçilir. Şirkət son 64 il ərzində dividend ödənişlərini fasiləsiz artırıb. Hər səhm üzrə 2,12 dollarlıq dividend və "Berkshire Hathaway"in təxminən 3,25 dollarlıq alış qiyməti nəzərə alındıqda, ilkin investisiya üzrə dividend gəlirliliyi təxminən 65%-ə çatır.

"Bank of America" — 26,5 milyard dollar (8%)

"Apple"da olduğu kimi, Varren Baffet təqaüdə çıxmazdan əvvəl "Bank of America" (NYSE: BAC) səhmlərinin də böyük hissəsini satıb. 2025-ci ilin sonuna qədər şirkətdəki payının 50%-ni azaldan Baffetin ardınca Qreq Abel də 2026-cı ilin ilk rübündə məhdud həcmdə satışları davam etdirib.

Bank sektoru iqtisadi dövrlərlə sıx əlaqəsi səbəbindən Baffetin sevimli investisiya istiqamətlərindən biri olub. Tarix göstərir ki, iqtisadi genişlənmə dövrləri resessiyalardan daha uzun sürür və bu, maliyyə institutlarının xeyrinə işləyir.

"Bank of America" ABŞ Federal Ehtiyat Sisteminin 2022-ci ilin mayından 2023-cü ilin iyuluna qədər həyata keçirdiyi faiz artımlarından ən çox faydalanan iri banklardan biri olub. Bank ABŞ-ın əsas bankları arasında faiz dərəcələrinə ən həssas qurumlardan sayılır və yüksək faizlər onun faiz gəlirlərini əhəmiyyətli dərəcədə artırıb.

Bununla belə, bankın qiymətləndirmə üstünlüyü əvvəlki qədər cəlbedici görünmür. Baffet 2011-ci ilin avqustunda investisiya etdiyi zaman bankın səhmləri balans dəyərinə nisbətən 62% endirimlə satılırdı. 2026-cı ilin əvvəlində isə səhmlər balans dəyərindən 43% yüksək qiymətləndirilirdi.

"Alphabet" — 22 milyard dollar (6,7%)

Qreq Abelin rəhbərliyi dövründə "Berkshire Hathaway" 2026-cı ilin ilk rübündə "Google"un ana şirkəti olan "Alphabet"dəki payını üç dəfədən çox artırıb. Alınan 36,4 milyon A sinifli və 3,6 milyon C sinifli səhm nəticəsində "Alphabet" şirkətin beşinci ən böyük investisiyasına çevrilib.

Abel də Baffet kimi davamlı rəqabət üstünlüyünə malik şirkətlərə üstünlük verir. "Alphabet" bu baxımdan "Google" vasitəsilə faktiki monopol mövqeyə malikdir. "GlobalStats" məlumatlarına görə, son on il ərzində "Google" qlobal internet axtarış trafikinin 89%-93%-ni nəzarətdə saxlayıb. Bundan əlavə, şirkətin "YouTube" platformasına sahib olması reklam qiymətlərində ciddi üstünlük yaradır.

Lakin "Alphabet"in uzunmüddətli böyümə potensialının əsas hissəsi "Google Cloud" platforması ilə bağlıdır. Generativ süni intellekt həllərinin və böyük dil modellərinin bu platformaya inteqrasiyası yüksək marjalı bulud xidmətləri seqmentində satışların sürətlə artmasına səbəb olub.

Şirkətin güclü balans hesabatı da investorlar üçün mühüm amildir. "Alphabet" mart ayını təxminən 127 milyard dollar nağd vəsait və likvid aktivlərlə başa vurub. Şirkət 2026-cı ilin ilk rübündə əməliyyat fəaliyyətindən təxminən 46 milyard dollar pul axını əldə edib ki, bu da səhmdarlar üçün yüksək gəlirlilik potensialı yaradır.

Tənzilə Ağabalayeva