Dünyanın ən çox qazanan 10 idmançısı açıqlanıb: Ronaldo yenidən zirvədədir

"Forbes" jurnalı 2026-cı il üçün dünyanın ən yüksək gəlir əldə edən idmançılarının reytinqini açıqlayıb. Siyahıya bu il də portuqaliyalı futbol ulduzu Kriştianu Ronaldo başçılıq edib.

Valyuta.az xəbər verir ki, 41 yaşlı hücumçu son 12 ay ərzində vergi və agent haqları çıxılmadan 300 milyon dollar gəlir əldə edib. Bunun 235 milyon dolları Səudiyyə Ərəbistanının "Əl-Nəsr" klubu ilə müqaviləsindən, 65 milyon dolları isə sponsorluq müqavilələri, reklam layihələri, lisenziyalaşdırma fəaliyyətləri və digər biznes təşəbbüslərindən formalaşıb.

Ronaldo ardıcıl dördüncü dəfə, ümumilikdə isə altıncı dəfə "Forbes"un ən çox qazanan idmançıları siyahısında birinci olub. O, bununla həm də basketbol əfsanəsi Maykl Cordanın altı liderlik göstəricisinə çatıb. Siyahının tarixində yalnız qolfçu Tayger Vuds daha çox – 11 dəfə birinci yerdə qərarlaşıb.

Bu il siyahıda yer alan idmançıların ümumi gəliri 1,4 milyard dollara çatıb. Bu göstərici ötən illə müqayisədə artım nümayiş etdirib. Maraqlıdır ki, ilk onluğa daxil olan bütün idmançılar son bir ildə ən azı 100 milyon dollar gəlir əldə etməyi bacarıblar.

Reytinqdə ikinci pillədə meksikalı boksçu Kanelo Alvares qərarlaşıb. Onun illik gəliri 170 milyon dollar olaraq qiymətləndirilib. Üçüncü yerdə isə ABŞ-nin "İnter Mayami" klubunda çıxış edən argentinalı futbolçu Lionel Messi yer alıb. Dünya çempionunun gəliri 140 milyon dollar təşkil edib.

Dördüncü sırada ABŞ-li basketbol ulduzu LeBron Ceyms qərarlaşıb. O, son bir ildə 137,8 milyon dollar qazanıb. Beşinci pillədə Yaponiyanın beysbol ulduzu Şohei Ohtani yer alıb. Onun illik gəliri 127,6 milyon dollar olub.

Siyahının altıncı sırasında daha bir NBA ulduzu Stefen Karri qərarlaşıb. "Qolden Steyt Uorriors"un lideri son 12 ay ərzində 124,7 milyon dollar gəlir əldə edib.

İlk onluğu tamamlayan idmançılar arasında ispaniyalı qolfçu Con Rahm (107 milyon dollar), fransalı futbolçu Kərim Benzema (104 milyon dollar), ABŞ-li basketbolçu Kevin Durant (103,8 milyon dollar) və Böyük Britaniyanın Formula 1 pilotu Lüis Hemilton (100 milyon dollar) yer alıblar.

Beləliklə, "Forbes"un 2026-cı il siyahısında yer alan 10 ən çox qazanan idmançı bunlardır:

Kriştianu Ronaldo (futbol, Portuqaliya) – 300 milyon dollar

Kanelo Alvares (boks, Meksika) – 170 milyon dollar

Lionel Messi (futbol, Argentina) – 140 milyon dollar

LeBron Ceyms (basketbol, ABŞ) – 137,8 milyon dollar

Şohei Ohtani (beysbol, Yaponiya) – 127,6 milyon dollar

Stefen Karri (basketbol, ABŞ) – 124,7 milyon dollar

Con Rahm (qolf, İspaniya) – 107 milyon dollar

Kərim Benzema (futbol, Fransa) – 104 milyon dollar

Kevin Durant (basketbol, ABŞ) – 103,8 milyon dollar

Lüis Hemilton (Formula 1, Böyük Britaniya) – 100 milyon dollar

Mütəxəssislərin fikrincə, idmançıların gəlirlərinin rekord səviyyəyə yüksəlməsində sponsorluq müqavilələri, şəxsi biznes layihələri və xüsusilə Yaxın Şərq ölkələrinin idmana yatırdığı böyük investisiyalar mühüm rol oynayıb.

Tənzilə Ağabalayeva