"Meta" Al infrastrukturunu gücləndirir: "Corning" ilə 6 milyard dollarlıq anlaşma

Süni intellekt və aparat təminatı sahəsində yatırımlarını sürətlə davam etdirən "Meta" bu sistemləri dəstəkləyəcək güclü infrastruktur tələb edir. Şirkət məlumat emalı qabiliyyətini artırmaq məqsədilə şüşə və fiber texnologiyaları ilə tanınan "Corning" ilə 6 milyard dollarlıq, çoxillik yeni bir anlaşmaya imza atıb. 

Valyuta.az xəbər verir ki, bu anlaşma çərçivəsində "Meta" məlumat mərkəzlərində istifadə olunmaq üçün fiber optik kabellər tədarük edəcək.

"Gorilla Glass" ilə tanınan "Corning", "Meta" üçün istehsal edəcəyi fiber optik kabelləri Şimali Karolinadakı müəssisələrində istehsal edəcək. Anlaşma sayəsində şirkət, ştatdakı istehsal gücünü artırmağı və mövcud işçi qüvvəsini 15–20 faiz böyütməyi planlaşdırır.

Məlumat mərkəzləri və fiber optik infrastruktur müasir internetin ən kritik elementlərindəndir. "Meta"nın yalnız ABŞ-da fəaliyyət göstərən və ya tikintisi davam edən 26-dan çox məlumat mərkəzi mövcuddur. Şirkətin paylaşdığı məlumatlara görə, bu obyektlər tikinti mərhələsində 30 mindən çox keyfiyyətli iş imkanı yaratmaqla yanaşı, əməliyyat dövründə 5 min nəfərə iş təmin edir.

"Meta" sosial media platformalarından süni intellekt dəstəklı söhbət botlarına və hətta "Ray-Ban Meta AI" ağıllı eynəklər kimi aparat məhsullarına qədər bir çox xidməti məlumat mərkəzləri vasitəsilə fəaliyyətə keçirir. Lakin bu nəhəng obyektlər yüksək enerji və təbii resurs sərfiyyatı ilə seçilir. Buna görə də "Meta" kimi texnologiya nəhəngləri dayanıqlı həllər üzərində işləyir.

"Meta"nın Texasın El Paso şəhərində inşa edilən məlumat mərkəzlərindən biri, şirkətin dayanıqlılıq hədəflərində mühüm rol oynayır. Planlaşdırılmış cədvələ görə obyekt fəaliyyətə başladıdan təxminən iki il sonra, 2030-cu ilədək “su pozitiv” vəziyyətə çatacaq. Yəni "Meta", süni intellektə fokuslanmış bu məlumat mərkəzinin istifadə etdiyi suyun 200 faizini yerli su hövzələrinə geri qaytaracağını öhdəsinə götürür.

"Meta" yalnız quru sahədə deyil, dəniz altında da infrastruktur yatırımlarını genişləndirir. Şirkətin "Project Waterworth" adlandırdığı layihə çərçivəsində üç yeni okean xətti yaradılacaq və 50 min kilometr uzunluğunda nəhəng bir dənizaltı fiber optik kabeli döşənəcək. Dünyanı demək olar ki, əhatə edəcək bu layihənin maliyyətinin 10 milyard dolları aşması gözlənilir.

"Meta"nın süni intellekt üçün ayırdığı büdcə hər il artmaqdadır. Baş direktor Mark Zukerberq 2025-ci ilin əvvəlində şirkətin həmin il üçün 60–65 milyard dollarlıq süni intellekt yatırımı planladığını açıqlamışdı. Bu rəqəm sonradan yenilənərək 72 milyard dollara çatdırıldı.

Paşa Məmmədli