"Anthropic" startapı 10 milyard dollardan çox investisiya cəlb etdi

ABŞ-da fəaliyyət göstərən süni intellekt startapı “Anthropic” (böyük dil modelləri olan “Claude” ailəsinin yaradıcısı) son maliyyələşmə raundunda 350 milyard dollar qiymətləndirmə ilə 10–15 milyard dollar arasında investisiya cəlb edib. 

CNBC telekanalının danışıqlarla tanış olan üç mənbəsinə istinadən verdiyi məlumata görə, investisiyanın həcmi “Microsoft” və “Nvidia” şirkətlərinin iştirak qərarından asılı olaraq arta bilər.

Xatırladaq ki, 2025-ci ilin noyabrında “Microsoft” və “Nvidia” müvafiq olaraq 5 milyard dollar və 10 milyard dollaradək sərmayə yatırma planlarını açıqlamışdı. Lakin onların son raundda iştirak edib-etməyəcəyi və yatırımların dəqiq həcmi hələ müəyyən edilməyib.

Maliyyələşmə mərhələsinə Sinqapurun suveren sərmayə fondu “GIC” və amerikalı investor “Coatue” rəhbərlik edir. “Financial Times” nəşrinin mənbələrinin bildirdiyinə görə, hər iki investor layihəyə 1,5 milyard dollar sərmayə qoyacaq. CNBC-nin məlumatına əsasən, bu raundda “Anthropic”in rəqibi olan “OpenAI” şirkətinin də investoru sayılan “Sequoia Capital” vençur fondu da iştirak edir.

Bundan əvvəl “Financial Times” yazmışdı ki, “Anthropic” ümumilikdə 25 milyard dollar investisiya cəlb etməyi və bu prosesin 350 milyard dollar qiymətləndirmə ilə baş tutmasını planlaşdırır. Bu, təxminən dörd ay əvvəlki 170 milyard dollarlıq qiymətləndirmə ilə müqayisədə ikiqat artım deməkdir. Mənbələrin vurğuladığına görə, raundun miqyası o qədər böyükdür ki, onu vençur sərmayələrindən çox, ictimai şirkətlərə yatırılan sərmayələrlə müqayisə etmək olar.

“Anthropic” 2021-ci ildə “OpenAI” şirkətinin keçmiş tədqiqat rəhbərlərinin, o cümlədən baş direktor Dariyo Amodeyin iştirakı ilə təsis edilib. Şirkət “Claude” adlı böyük dil modellərinin hazırlanması ilə tanınır. Onun süni intellekt proqramlaşdırma aləti “Claude Code” son aylarda geniş populyarlıq qazanıb. Nəticə etibarilə, 2025-ci ildə şirkətin gəliri 10 milyard dollara çatıb.

Hazırda startap ilkin ictimai təklifə (IPO) hazırlaşır. “Financial Times”ın mənbələrindən biri “Anthropic”in 2026-cı ildə IPO üçün hazır ola biləcəyini bildirib. Lakin şirkətə yaxın başqa bir mənbə bu ehtimalı inandırıcı saymayıb. Şirkətin nümayəndəsi isə IPO qərarının və onun vaxtının hələ qəbul edilmədiyini qeyd edib.

Aydın