Mərkəzi Bank 38 daşınmaz əmlakını təkrar hərraca çıxarır

Mərkəzi Bankın balansında olan daşınmaz əmlaklar 13 avqust tarixində təkrar hərraca çıxarılacaq.

Valyuta.az xəbər verir ki, hərraca ümumilikdə 38 daşınmaz əmlak çıxarılır. Onlardan 35-i Xətai rayonu, 8 Noyabr prospektində yerləşən "Amay TM" biznes mərkəzindəki qeyri-yaşayış sahələridir. Digər əmlaklardan biri Bakı şəhərinin Nərimanov rayonunda, biri Yasamal rayonunda, sonuncusu isə Xətai rayonunda yerləşir.

Hərraca çıxarılan daşınmaz əmlakların sahəsi 69,8 kvadratmetrdən 15 778,1 kvadratmetrə qədər dəyişir. İlkin satış qiymətləri isə 60 min manatdan 16,4 milyon manatadək müəyyən edilib.

Qeyd olunur ki, hərracda iştirak etmək istəyən şəxslər ilkin satış qiymətinin 5 faizi həcmində beh ödəməlidirlər. Beh məbləği əmlakdan asılı olaraq 3 min manatdan 820 min manatadək dəyişir.

Sərvanə Rəmixanova