JPMorgan-ın baş direktoru növbəti kredit böhranı ilə bağlı xəbərdarlıq edib

ABŞ-ın ən böyük bankı olan JPMorgan Chase-in baş direktoru Ceymi Daymon (Jamie Dimon) növbəti kredit dövrünün əvvəlində itkilərin gözləniləndən daha ağır ola biləcəyi barədə xəbərdarlıq edib. Böyük bankların ikinci rüb üzrə maliyyə hesabatları sektorun iqtisadi qeyri-müəyyənliyə baxmayaraq dayanıqlığını nümayiş etdirsə də, JPMorgan Chase mümkün iqtisadi durğunluğa hazırlaşmağa davam edir.

Volatilliyin və istehlak xərclərinin artmasına baxmayaraq, ABŞ-ın aparıcı bankları ikinci rübdə güclü maliyyə nəticələri açıqlayıb. Bu isə bank sektorunun mövcud iqtisadi risklər fonunda sabit qaldığını göstərir.

Valyuta.Az Yahoo Finance-a istinadlaJPMorgan Chase-in bu ilin əvvəlində keçirilən maliyyə nəticələrinə həsr olunmuş konfrans zəngi zamanı Ceymi Daymon ABŞ iqtisadiyyatının resessiyaya daxil olub-olmayacağı ilə bağlı proqnoz verməkdən çəkinib. Bununla belə, o, dəfələrlə vurğulayıb ki, növbəti kredit dövründə yüksək riskli korporativ kreditlər (leveraged loans) üzrə itkilər bazarın gözləntilərindən daha böyük ola bilər.

Böyük bankların son maliyyə hesabatlarından görünür ki, ticarət əməliyyatlarından əldə olunan gəlirlər bazarlardakı yüksək aktivlik və investorlar arasında qeyri-müəyyənliyin artması fonunda yüksəlib.

Bazarlarda dəyişkənliyin artması bankların ticarət bölmələri üçün əlavə gəlir imkanları yaradır. Belə şəraitdə investorlar portfellərini daha tez-tez yenidən formalaşdırır və alqı-satqı əməliyyatlarının həcmi artır. Bununla yanaşı, yüksək volatillik fərdi investorlar üçün də risk siqnalı hesab olunur, çünki bu, səhm qiymətlərində kəskin dəyişikliklərə və iqtisadi perspektivlərlə bağlı qeyri-müəyyənliyin artmasına səbəb olur.

Ekspertlərin sözlərinə görə, bankların gəlirlərində artım yalnız ticarət əməliyyatları ilə məhdudlaşmayıb. Varlıqların idarə edilməsi sahəsində də ikirəqəmli artım qeydə alınıb.

Bank of America bildirib ki, qlobal varlıqların və investisiyaların idarə olunmasından əldə edilən gəlirlər illik müqayisədə 12 faiz artıb. Bank bunu aktivlərin idarə edilməsinə görə komissiya gəlirlərinin 15 faiz artaraq 4,2 milyard dollara çatması və güclü kapital axınları ilə izah edib.

Başqa sözlə, bankın idarə etdiyi müştəri aktivlərinin həcmi artıb. Buna bazar dəyərlərinin yüksəlməsi və investisiya axınlarının davam etməsi müsbət təsir göstərib.