"Lukoil"un aktivlərini hansı şirkət alır? - İlkin razılaşma əldə olundu

Səudiyyə Ərəbistanı tərəfindən dəstəklənən "Midad Energy" şirkəti Rusiyanın sanksiyalara məruz qalan enerji nəhəngi Lukoil-un aktivlərinin alınması ilə bağlı ilkin razılaşma sənədi - “term sheet” imzalayıb.

Valyuta.az xəbər verir ki, razılaşma ABŞ tənzimləyici orqanlarının təsdiqindən asılıdır.

Məlumata görə, yanvar ayının sonunda imzalanan sənəd "Lukoil"un hədəflənmiş bütün aktivlərini əhatə edir. "Midad" şirkəti təklif etdiyi məbləği nağd şəkildə eskrou hesabına yerləşdirməyə razılaşıb. Bu mexanizm ABŞ Maliyyə Nazirliyi də daxil olmaqla zəruri icazələr alınana qədər vəsaitin qorunmasını təmin etmək məqsədi daşıyır.

Mənbələrin bildirdiyinə görə, razılaşma yüksək riskli hesab olunur və "Midad"ın Səudiyyə Ərəbistanındakı güclü siyasi əlaqələri prosesdə mühüm rol oynayır. Şirkət sövdələşmə üçün bütün tənzimləyici tələblərə əməl etməyə çalışır.

Qeyd edək ki, "Midad" bu aktivlər uğrunda tək deyil, əsas rəqiblərdən biri ABŞ-ın nəhəng investisiya şirkəti "Carlyle Group" olub. Lakin sanksiyalar və geosiyasi gərginliklər səbəbindən proses mürəkkəb və qeyri-müəyyən olaraq qalır.

ABŞ hakimiyyəti son aylarda Rusiya enerji aktivləri ilə bağlı bir sıra müvəqqəti ümumi lisenziyaların müddətini uzadıb. Bu addım bazarlarda kəskin pozuntuların qarşısını almaq və aktivlərin idarəedilməsinə nəzarəti saxlamaq məqsədi daşıyır.

Bununla belə, "Lukoil"un aktivlərinin yekun satışı üçün ABŞ hökumətinin açıq və konkret icazəsi tələb olunur. Vaşinqtonun bu satışa razılıq verib-verməyəcəyi isə hələ də bəlli deyil.

Sərvanə Rəmixanova