"Azərbaycanda startap qurarkən mütləq nəzərə almaq lazımdır ki..."- Nicat Manafov

Xarici platformada yayımlanan bir nümunədə startapın ideya rəhbəri layihəsini investorlara təqdim edir, lakin tələb etdiyi investisiyanı ala bilmir. Buna baxmayaraq, o, layihə üzərində işləməyə davam edir və sonradan startapı gəlir gətirən real biznes modelinə çevirir. Bu sadəcə bir nümunədir.

Amma daha çox eşidirik ki, investisiyasız böyümək olmur. Yəni sual yaranır ki, “İnvestorsuz böyümək mümkündürmü?”

Valyuta.az-a danışan sahibkar Nicat Manafov bildirib ki, investisiya olmadan da startap böyütmək mümkündür:

"Bu tip startapların sayı olduqca azdır. Əsasən startapların ana böyümə mənbəyi investisiyadır. Əgər startap investisiya olmadan böyüyə bilirsə, bu, kifayət qədər güclü və bazarda tələb yaradan ideyaya əsaslanmalıdır. Belə halda startap bazardan əldə etdiyi gəlir hesabına öz fəaliyyətinə yenidən investisiya edə bilir. Məhsul və ya xidmətlərin satışından əldə olunan gəlir reklam, inkişaf və digər əməliyyat xərclərinə yönəldilir. Bu model çərçivəsində böyümə mümkündür, lakin proses daha ləng gedir. Startapın əsas məntiqi isə ondan ibarətdir ki, gəlir əldə etmək potensialı olan ideya investisiya vasitəsilə qısa müddətdə sürətlə böyüdülsün. Bu səbəbdən yalnız tədricən böyüyən bizneslər zamanla startap modelindən uzaqlaşaraq daha çox ənənəvi biznesə çevrilirlər".

"Azərbaycan, Türkiyə kimi ölkələrdə startap qurarkən nəzərə almaq lazımdır ki, bu regionlarda investor bazası məhduddur. Buna görə də startaplar ən azı öz xərclərini qarşılaya bilən model qurmalıdırlar ki, investor axtarışı dövründə bir neçə il ərzində fəaliyyətlərini davam etdirə bilsinlər. Region startapçıları bu amili mütləq nəzərə almalıdırlar", - deyə N.Manafov əlavə edib. 

Mayya Hüseynova