“İnstagram”da ancaq bu şərtlə canlı açmaq mümkün olacaq - Qərar qəbul edildi

İnstagram platformasında canlı yayım funksiyasından istifadə etmək istəyən istifadəçilər üçün yeni məhdudiyyət tətbiq olunub. 

Valyuta.az xəbər verir ki, artıq yalnız ictimai hesabı olan və ən azı 1000 izləyiciyə malik istifadəçilər canlı yayım açmaq hüququna sahib olacaqlar.
Daha əvvəl bütün istifadəçilər üçün əlçatan olan bu imkan “Meta” şirkətinin yeni qərarı ilə yalnız müəyyən şərtlərə cavab verən hesablarla məhdudlaşdırılıb. Bu addım xüsusilə yeni başlayan mikro məzmun yaradıcılarının platformada görünürlüyünə ciddi təsir göstərə bilər.

"Canlı yayım üçün uyğun deyilsiniz" bildirimi yeni qaydalarla hesabı gizli olan və ya 1000 izləyicidən az izləyicisi olan istifadəçilər canlı yayım açmağa çalışdıqda, aşağıdakı məzmunlu bildirim ilə qarşılaşacaqlar:

"Hesabınız canlı yayım üçün uyğun deyil. Bu funksiyanı istifadə etmək üçün hesabınız ictimai olmalı və ən azı 1000 izləyiciniz olmalıdır".

“İnstagram”ın bu qərarı nəyə xidmət edir? 

“İnstagram” bu dəyişikliyin əsas məqsədini “canlı yayım izləmə təcrübəsini yaxşılaşdırmaq” kimi təqdim etsə də, bunun arxasında texniki resursların optimallaşdırılması və az izləyicili yayım xərclərini azaltmaq kimi iqtisadi səbəblərin dayandığı ehtimal olunur.

Qeyd edək ki, “TikTok” platformasında (Hindistan istisna olmaqla) canlı yayım açmaq üçün 1000 izləyici şərti mövcuddur. “YouTube” isə bu baxımdan daha əlçatandır - sadəcə 50 abunəçi kifayət edir.

Sosial media artıq “hamının səhnəsi” deyilmi? 

“İnstagram”ın bu addımı bir tərəfdən platformadakı keyfiyyətli yayımları təşviq etsə də, digər tərəfdən yeni məzmun yaradıcılarının inkişaf imkanlarını məhdudlaşdırır. Bu qərarla sosial media məkanı artıq bütün istifadəçilərə bərabər imkanlar təqdim edən bir sahə olmaqdan uzaqlaşa bilər.

Sərvanə Rəmixanova