İlon Mask tarixdə ilk trilyonçu oldu - sərvəti 1,1 trilyon dolları ötdü

“SpaceX” şirkətinin tarixdə ən böyük ilkin kütləvi təkliflərdən (IPO) birini həyata keçirməsi İlon Maskın sərvətini rekord səviyyəyə çatdırıb.

Valyuta.az xəbər verir ki, şirkət səhmlərinin birinin qiyməti 135 dollar müəyyən edilib və bu, “SpaceX”in bazar dəyərini təxminən 75 milyard dollar artırıb.

“SpaceX”in açıqladığı məlumatlara görə, Mask şirkətin səhmlərinin təxminən yarısına sahibdir. Onun payının dəyəri IPO qiymətinə əsasən 867 milyard dollar təşkil edir. Maskın “Tesla”dakı payları da nəzərə alındıqda, onun ümumi sərvəti 1,1 trilyon dolları ötür.

Bununla da İlon Mask kağız üzərində dünyanın ilk trilyonçusu statusunu qazanıb. Bununla belə, onun sərvətinin bir hissəsi gələcəkdə əldə edilə biləcək səhmlərdən formalaşır. Həmin səhmlərin verilməsi Marsda insan məskəninin yaradılması və kosmosda məlumat mərkəzlərinin qurulması kimi iddialı hədəflərin reallaşdırılmasından asılıdır.

Bu səhmlər nəzərə alınmasa belə, Maskın sərvəti artıq trilyon dollar həddinə çox yaxınlaşıb. “SpaceX” səhmlərinin qiyməti 140 dollara yüksələcəyi təqdirdə isə o, əlavə şərtlər olmadan da rəsmi olaraq trilyonçu hesab ediləcək.

Hazırda Maskın sərvəti dünyanın növbəti dörd ən varlı şəxsi – “Google”un həmtəsisçiləri Larri Peyc və Sergey Brin, “Amazon”un qurucusu Ceff Bezos və “Oracle”ın təsisçisi Larri Ellisonun ümumi sərvətinə yaxındır.

Qeyd edək ki, “SpaceX” son illərdə süni intellekt layihələrinə böyük sərmayələr yatırıb və 2023-cü ilin əvvəlindən bəri təxminən 13 milyard dollar zərər açıqlayıb.

Sərvanə Rəmixanova