"Grok"un təhlükəsizlik problemlərini məlumat verdi, işdən qovuldu

İlon Maskın süni intellekt şirkəti "xAI" keçmiş mühəndisinin açdığı məhkəmə iddiası ilə gündəmə gəlib. Keçmiş əməkdaş Devin Kim iddia edir ki, şirkətin süni intellekt modeli "Grok"un təhlükəsizlik problemləri barədə rəhbərliyə məlumat verdikdən sonra işdən çıxarılıb.

Valyuta.az xəbər ki, Kaliforniya ştat məhkəməsinə təqdim olunan iddia ərizəsində yalnız "xAI" deyil, həm də "SpaceX" cavabdeh qismində göstərilib. Məhkəmə prosesinin "SpaceX"in planlaşdırılan böyük ilkin səhmlərin yerləşdirilməsi (IPO) mərhələsinə az qalmış başlanması da diqqət çəkib.

Devin Kimin sözlərinə görə, o, şirkətdə işlədiyi müddətdə "Grok"un təhlükəsizliyi ilə bağlı rəhbərliyə dəfələrlə xəbərdarlıq edib. O, modelin ayrı-seçkilik xarakterli məzmun yarada biləcəyini və kütləvi qırğın silahları ilə bağlı təhlükəli məlumatların yayılmasına səbəb ola biləcəyini bildirib.

İddiada qeyd olunur ki, sonradan "Grok"un özünü "MechaHitler" kimi ifadələrlə təqdim etməsi və "X" platformasında razılıq olmadan açıq-saçıq məzmun paylaşması bu narahatlıqları yenidən gündəmə gətirib.

Məhkəmə sənədlərində diqqət çəkən məqamlardan biri İlon Maskın birbaşa ittiham olunmamasıdır. Devin Kimin vəkillərinin bildirdiyinə görə, Mask şirkətə təhlükəsizlik testlərinin tam şəkildə aparılması barədə aydın göstərişlər verib.

Əsas ittihamlar isə "xAI" şirkətinin həmtəsisçisi olmuş və yaxın zamanda şirkətdən ayrılan Cimmi Baya qarşı irəli sürülür. İddiaya əsasən, Ba bu göstərişlərə əməl etməyib, Kimə təzyiq göstərib və söhbətlərdən birində belə deyib: "Süni intellekt onsuz da hamımızı öldürəcək. Mən sadəcə superzəkaya ilk çatan olmaq istəyirəm".

Məhkəmə sənədlərində 2025-ci ilin avqustunda baş verdiyi iddia edilən başqa bir hadisə də yer alıb. Bildirilir ki, Cimmi Ba "Grok Code 1" modelinin təqdimatı zamanı Avropa İttifaqının təhlükəsizlik tələblərindən yayınmağa çalışıb və məcburi testlərdən qaçmaq üçün modeli fərqli şəkildə təqdim edib.

Sənədlərdə ona aid edildiyi iddia olunan digər ifadə isə belədir: "Mən zəif performans göstərən model yox, təhlükəsiz olmayan model təqdim etməyi üstün tutaram".

İddiada qeyd olunur ki, sonradan vəziyyətə şəxsən İlon Mask müdaxilə etməli olub.

Devin Kim bildirir ki, 2025-ci ilin sentyabrında təhlükəsizliklə bağlı əldə etdiyi nəticələri şirkət daxilində təqdim etməyə hazırlaşarkən təcili görüşə çağırılıb və həmin görüşdə səbəb göstərilmədən işdən azad edilib.

Hazırda keçmiş mühəndis maddi təzminat tələb edir və məhkəmədən işdən çıxarılmasının qanunsuz hesab olunmasını istəyir.

Qeyd edək ki, bu iddialar məhkəmə prosesinin bir hissəsidir və hələlik məhkəmə tərəfindən təsdiqlənmiş faktlar hesab edilmir. "xAI", "SpaceX" və adı çəkilən şəxslər tərəfindən irəli sürülən ittihamlarla bağlı yekun hüquqi qərar verilməyib.

Paşa Məmmədli