"Ford" süni intellekt köməkçisini təqdim etməyə hazırlaşır

ABŞ-ın avtomobil istehsalı nəhəngi "Ford" süni intellekt əsaslı rəqəmsal köməkçi üzərində işlədiyini və "BlueCruise" adlı "hands-free" sürücü dəstək sisteminin yeni nəslini hazırladığını açıqlayıb. 

Valyuta.az xəbər verir ki, AI köməkçi ilk mərhələdə "Ford"un smartfon tətbiqində 2026-cı ilin əvvəlində istifadəyə veriləcək. Daha sonra isə 2027-ci ildə avtomobillərə inteqrasiya olunacaq. Köməkçi "Google Cloud" üzərində qurulacaq və hazır böyük dil modellərindən (LLM) istifadə edəcək. Sistem avtomobilə dair detallı məlumatlara çıxış əldə edəcək. Məsələn, yük tutumu, yağın istifadə müddəti kimi sualları real vaxtda cavablandıra biləcək.

"Ford" həmçinin "BlueCruise" texnologiyasının yeni nəslini təqdim edib. Şirkət bildirir ki, yeni sistem mövcud versiyadan təxminən 30% daha ucuz istehsal olunacaq və funksional imkanları daha geniş olacaq. Yeni "BlueCruise"un 2027-ci ildə "Ford"un aşağı xərcli "Universal Electric Vehicle" platformasında hazırlanacaq ilk elektrikli modeldə (orta ölçülü pikap) istifadəyə verilməsi planlaşdırılır.

"Ford"un açıqlamasına əsasən, bu sistem 2028-ci ildə “gözləri yoldan ayıraraq” sürmə (eyes-off driving) imkanına doğru inkişaf edəcək. Bundan əlavə, texnologiya “nöqtədən-nöqtəyə avtonom sürmə” funksiyasını da dəstəkləyəcək. Bununla belə, şirkət vurğulayır ki, sürücü hər an idarəetməni ələ almağa hazır olmalıdır.

Sərvanə Rəmixanova