Evdəki hesab ofisə uyğun gəlmədi: Xərclər kəskin artdı

Ofis əməkdaşlarının fiziki olaraq iş yerlərinə qayıtması ilə yanaşı, müəssisələrin enerji xərclərində də kəskin artım müşahidə olunur. Şirkətlər qlobal pandemiyadan sonra iş rejimini yenidən formalaşdırarkən, yeni araşdırmaya görə yüksək enerji xərclərinin əsas səbəbi cihazların səmərəliliyindən çox, əməkdaşların davranış vərdişləridir.

Valyuta.az-ın məlumatına görə, aparılan hesablamalar göstərir ki, tək bir kompüterin illik elektrik xərci Böyük Britaniyada bir müəssisə üçün 90 funt-sterlinqdən (təxminən 208 manat) artıq ola bilər. Lakin bu xərclərin azaldılması istiqamətində əməkdaşların laqeyd münasibəti rəqəmlərin özündən daha diqqətçəkicidir.

"Uswitch" tərəfindən aparılan araşdırmaya əsasən, hər beş əməkdaşdan biri iş günü bitdikdən sonra kompüterini və ya monitorunu söndürmür. Üstəlik, problem yalnız gündəlik iş rejimi ilə məhdudlaşmır. İşçilərin dörddə biri tətil dövrlərində və ya ofisin uzun müddət bağlı qaldığı vaxtlarda belə cihazları elektrik şəbəkəsinə qoşulu və aktiv vəziyyətdə saxlayır. Ekran qarşısından uzun müddət uzaqlaşdıqda monitoru söndürənlərin sayı azdır, kompüteri yuxu rejiminə keçirənlərin payı isə daha da aşağıdır.

Əməkdaşların əksəriyyəti enerji qənaəti ilə bağlı təşəbbüskar addımlar atmır. Məsələn, ekran parlaqlığını azaldaraq enerji sərfiyyatını minimuma endirənlərin nisbəti cəmi üçdə bir təşkil edir. Enerji sahəsi üzrə mütəxəssislər bu vəziyyət fonunda müəssisə sahiblərinin vaxt itirmədən enerji auditi aparmalı olduğunu bildirirlər. Elektrik israfının dəqiq harada baş verdiyini müəyyənləşdirmək problemin həlli üçün ilk və ən vacib addımdır.

Mütəxəssislər köhnə və səmərəsiz avadanlıqların yenilənməsinin vacibliyini qeyd etsələr də, əsas həll yolunun personalın maarifləndirilməsindən keçdiyini vurğulayırlar. Enerji siyasətləri əməkdaşlara yalnız dayanıqlılıq prinsipləri çərçivəsində deyil, həm də maliyyə faydaları ilə birlikdə daha şəffaf şəkildə izah edilməlidir. Bildirilir ki, işçilər kiçik dəyişikliklərin şirkətin ümumi büdcəsinə necə töhfə verdiyini anladıqda, davranışlarını dəyişməyə daha meyilli olurlar.

Bununla yanaşı, müəssisələrin müqavilə müddəti başa çatmamışdan aylar əvvəl alternativ təchizatçılarla danışıqlara başlaması və daha sərfəli tariflər axtarması da strateji addım kimi qiymətləndirilir.

Paşa Məmmədli