Dünyanın ən işlək hava limanı açıqlandı: Bir ildə 95,2 milyon sərnişin

Dubay Beynəlxalq Hava Limanı dünyanın ən çox sərnişin qəbul edən aviabazası statusunu təsdiqləyib və 2025-ci ildə rekord göstərici ilə 95,2 milyon sərnişinə xidmət göstərib.

Valyuta.az "The Independent"ə istinadən xəbər verir ki, Dubaya gələn turistlərin sayı ötən illə müqayisədə 5% artıb. Əmirlik tarixi rekord sayda - 19,6 milyon ziyarətçi qəbul edib ki, bu da ardıcıl üçüncü il rekord göstəricidir.

Hava limanı davamlı olaraq göstəricilərini artırır. Müqayisə üçün: 2024-cü ildə 92,3 milyon, 2023-cü ildə isə 86,9 milyon sərnişin qəbul edilib. Pandemiya öncəsi 2019-cu ildə sərnişin sayı 86,3 milyon, 2018-ci ildə isə 89,1 milyon olub.

Ən populyar uçuş istiqaməti Hindistan olub - 11,9 milyon sərnişin. Sonrakı yerlərdə Səudiyyə Ərəbistanı (7,5 milyon) və Böyük Britaniya (6,3 milyon) gəlir. Ümumilikdə hava limanı 108 aviakompaniya ilə əməkdaşlıq edir, bu şirkətlər 110 ölkədə 291 şəhərə uçuşlar həyata keçirir.

Eyni zamanda şəhər nəqliyyat yükünün və yaşam xərclərinin artması ilə mübarizə aparır ki, bu da həm BƏƏ vətəndaşlarına, həm də ölkədə işləyən xaricilərə əlavə təzyiq yaradır.

Gələcək planlara görə, əsas əməliyyatların şəhərdən təxminən 45 km aralıda yerləşən digər beynəlxalq hava limanı Əl-Maktuma köçürülməsi nəzərdə tutulur. Təxminən 35 milyard dollar dəyərində modernləşmədən sonra bu köçürmə 2032-ci ilə planlaşdırılır.

Paşa Məmmədli