Dolların üzərində Trampın imzası? – Rusiya mediasında yayılan məlumatlar təsdiqlənmir

Rusiya mətbuatı Donald Trampın imzasının ABŞ dollarının üzərində yerləşdiriləcəyi ilə bağlı xəbər yayıb. Lakin ABŞ mediasında bu məlumat təsdiqini tapmır və spekulyativ xarakter daşıyır.

TASS agentliyinin yaydığı xəbərə görə, ABŞ Maliyyə Nazirliyi ölkənin yaranmasının 250 illik yubileyi münasibətilə yeni təşəbbüs irəli sürüb. Bildirilir ki, plana əsasən, ABŞ dolları üzərində hazırkı Prezident Donald Trampın və maliyyə naziri Skott Bessentin imzaları yerləşdirilə bilər.

Məlumatda qeyd olunur ki, Skott Bessent çıxışında Prezident Donald Trampın adını daşıyan dollarların dövriyyəyə buraxılmasının ölkənin tarixi uğurlarını yaddaşlarda saxlamaq baxımından simvolik əhəmiyyət daşıyacağını bildirib.

Bununla belə, ABŞ-ın aparıcı media qurumları – Reuters və Associated Press – belə bir qərarın qəbul edilməsi ilə bağlı hər hansı rəsmi məlumat yaymayıb. Mövcud qaydalara əsasən, ABŞ dollar əskinaslarında yalnız maliyyə naziri və xəzinədarın imzaları yer alır və bu praktika uzun illərdir dəyişməz qalır.

ABŞ-da pul nişanlarının dizaynı və dəyişdirilməsi ABŞ Maliyyə Nazirliyi tərəfindən təsdiqlənir və bu proses ciddi təhlükəsizlik standartları və uzunmüddətli planlaşdırma əsasında həyata keçirilir. 2026-cı ildə ölkənin 250 illik yubileyi ilə bağlı müxtəlif təşəbbüslərin müzakirə olunduğu bildirilsə də, prezident imzasının dollar üzərində yerləşdirilməsi ilə bağlı rəsmi qərar açıqlanmayıb.

Tarixən ABŞ dollarında dəyişikliklər əsasən dizayn və portretlərlə bağlı olub. Müxtəlif dövrlərdə Avraam Linkoln və Corc Vaşinqton kimi prezidentlərin təsvirləri əskinaslarda əks etdirilib və bu dəyişikliklər qanunvericilik prosedurları əsasında həyata keçirilib.

Xatırladaq ki, 1776-cı ildə qəbul edilən Müstəqillik Bəyannaməsi ilə ABŞ-nin Britaniya İmperiyasından asılılığına son qoyulub. Sənəd 1776-cı il iyulun 2-də Filadelfiyada qəbul edilib, iyulun 4-də isə onun redaktə olunmuş variantı təsdiqlənərək yayımlanıb. Bu səbəbdən 4 iyul ABŞ-də Müstəqillik Günü kimi qeyd olunur.

Aydın