“Dataroid” 6,6 milyon dollar investisiya alıb

Rəqəmsal analitika və müştəri əlaqələri platforması olan “Dataroid” "Seri A" mərhələsindən əvvəlki investisiya raundunda 6,6 milyon dollar sərmayə topladığını açıqlayıb.

Valyuta.az xəbər verir ki, şirkət əldə olunan investisiyanı ilk növbədə EMEA (Avropa, Yaxın Şərq və Afrika) regionu olmaqla müxtəlif coğrafiyalarda əməliyyatlarını genişləndirmək, qlobal marketinq fəaliyyətlərini sürətləndirmək və süni intellekt əsaslı məhsul inkişafına yönəltməyi planlaşdırır.

“Dataroid” xüsusilə özünəxidmət analitika imkanlarını gücləndirməyi qarşıya məqsəd qoyub.

Fatih İşbecer, Elif Parlak və Can Elmas tərəfindən təsis edilən “Dataroid” əsasən bankçılıq və maliyyə başda olmaqla, tənzimləmə səviyyəsinin yüksək olduğu sahələrdə rəqəmsal analitika həlləri təqdim edir. Şirkət hazırda 120 milyondan artıq istifadəçinin rəqəmsal təcrübəsinə təsir göstərir.

“G2” platformasının 2025-ci il üzrə hesabatına əsasən, “Dataroid” Yaxın Şərqdə rəqəmsal analitika kateqoriyasında birinci yerdə qərarlaşıb. Bundan əlavə, “Ən yaxşı dəstək” kateqoriyasında istifadəçi rəylərinə əsasən lider mövqedədir.

Şirkət 2025-ci ili 127 faiz xalis gəlir qoruma göstəricisi ilə başa vurduğunu, müştəri və gəlir baxımından heç bir itki yaşamadan ili tamamladığını bildirib. “Dataroid” 2023-cü ilin dekabrında “Koç GSYF” və “Türkiyə İş Bankası” tərəfindən təsis edilən “100. Yıl Girişim Sermayesi”ndən (indiki adı ilə “TIBAS Ventures”) 2 milyon dollar sərmayə almışdı.

Mayya Hüseynova