Biznesinizi zərərə uğradan 10 əsas səbəb - SƏHƏR OXUSU

Biznesin gəlir gətirmək əvəzinə zərər etməsi sahibkarlar üçün ən çətin və stresli məqamlardan biridir. Xüsusilə problemin mənbəyi aydın olmadıqda, maliyyə itkisi daha da dərinləşə bilər. Biznesdə pul itkisinin qarşısını almağın ilk və ən vacib addımı problemin səbəblərini düzgün müəyyənləşdirməkdir.

Valyuta.az aşağıda bizneslərin ən çox zərərə düşməsinə səbəb olan 10 əsas amili təqdim edir:

1. Zəif mühasibatlıq

Xərclərin düzgün uçota alınmaması, vergilərlə bağlı səhvlər və qeyri-dəqiq hesabatlar biznes üçün ciddi maliyyə itkilərinə yol aça bilər. Bir çox hallarda sahibkarların peşəkar mühasib xidmətindən istifadə etməməsi zərərin əsas səbəbi olur.

2. Məhsulların yanlış qiymətləndirilməsi

Məhsulun həddindən artıq ucuz və ya baha qiymətə təklif edilməsi gəlirliliyi azaldır. Aşağı qiymət mənfəəti məhdudlaşdırırsa, yüksək qiymət alıcıları uzaqlaşdıra bilər.

3. Şəxsi və biznes hesablarının qarışdırılması

Şəxsi və biznes maliyyəsinin eyni bank hesabında idarə olunması xərclərə nəzarəti çətinləşdirir və artıq xərcləməyə səbəb olur.

4. İnvestisiya və maliyyə mənbələrinin çatışmazlığı

Kredit, investisiya və maliyyə dəstəyi olmadan biznesin böyüməsi çətinləşir. Zəif maliyyə tarixçəsi və qeyri-peşəkar biznes planlar investorların marağını azaldır.

5. Onlayn platformaların nəzərə alınmaması

Mütəxəssislər bildirirlər ki, yalnız fiziki mağaza ilə fəaliyyət göstərən bizneslər böyük müştəri potensialını itirir. Onlayn satış kanalları gəlirliliyi əhəmiyyətli dərəcədə artıra bilər.

6. Qüsurlu biznes modeli

Dəqiq qurulmamış və ya ümumiyyətlə mövcud olmayan biznes modeli uzunmüddətli zərərlərə yol açır. Aydın strategiya olmayan bizneslərdə maliyyə itkiləri qaçılmaz olur.

7. Səmərəsizlik

İşçi heyətində, təchizat zəncirində və ya texnoloji proseslərdə yaranan səmərəsizliklər xərcləri artırır və gəlirliliyi azaldır.

8. Zəif marketinq strategiyası

Hədəf auditoriyanın düzgün müəyyən edilməməsi və təsirsiz reklam strategiyası satışların azalmasına səbəb olur. Marketoloqların əksəriyyəti müştəri cəlb etməkdə çətinlik yaşadıqlarını etiraf edir.

9. Təchizatçılarla münasibətlərin düzgün qurulmaması

Təchizatçılarla qiymət danışıqlarının aparılmaması və şərtlərin müzakirə edilməməsi xərclərin artmasına gətirib çıxarır.

10. Dağınıq idarəetmə

Sənədlərin, qaimələrin və maliyyə məlumatlarının səliqəsiz saxlanılması maliyyə səhvlərini artırır və problemlərin vaxtında aşkar edilməsini çətinləşdirir.

Sərvanə Rəmixanova