12 milyardlıq şirkətin rəhbəri: "Sərmayəçilər süni intellekt şirkətlərinin səhmlərinə güvənməməlidir"

Wall Street-in əksər iştirakçıları 2026-cı ildə də süni intellekt (SI) sahəsindəki ticarətə nikbin yanaşsa da, 12 milyard dollarlıq sərvəti idarə edən bir şirkətin sərmayə rəhbəri bu yanaşmanı bölüşmür.

“OnePoint BFG Wealth Partners” şirkətinin baş investisiya direktoru Piter Bukvar hesab edir ki, SI sahəsindəki uğurlara baxmayaraq, 2025-ci ilin parlaq nəticələri bu il təkrarlana bilməz və sərmayəçilər diqqətlərini bu sahədən yayındırmalıdırlar.

Texnologiya sektorunun əsas oyunçuları olan "Nvidia", "Meta Platforms" və "Microsoft" 2026-cı ilə zəif başlanğıc ediblər. Bukvar bildirir ki, bu şirkətlərin əvvəlki artım tempini saxlamaq mümkün deyil və onların dominantlığı tədricən sona çatır.

"Sərmayəçilər SI texnologiyalarına kor-koranə bel bağlamamalı, bazarda uğurlu ola biləcək digər sahələri də nəzərə almalıdırlar," – deyə o, CNBC-yə bildirib.

Bukvar hesab edir ki, bazar tədricən süni intellekt texnologiyalarını ön planda saxlayan istiqamətdən uzaqlaşır və bəzi sərmayəçilər bu dəyişiklikləri nəzərdən qaçırır.

"2026-cı ildə SI texnologiyalarının bazara rəhbərlik etmə gücü tədricən azalır," – deyə o əlavə edib. "Biz 'Nvidia'nın hesabatına bazarın reaksiyasını gördük. 'Meta' şirkəti isə həddindən artıq xərclərinə görə sərt şəkildə cəzalandırıldı."

Bukvar həmçinin "Oracle" şirkətinin zəif üçüncü rüb maliyyə nəticələrini və 2025-ci ildə 90% bahalaşmasına baxmayaraq yüksək borclanma və qeyri-sabit gəlirlilik riski ilə qarşılaşan "CoreWeave" kimi şirkətləri də nümunə göstərib. Onun fikrincə, bazar artıq bu sektoru fərqləndirməyə başlayıb və sərmayəçilər anlayır ki, burada həm qaliblər, həm də uduzanlar olacaq.

"2025-ci ildə bütün kapital xərcləri məlumat mərkəzlərinə yönəldildi," – deyə Bukvar bildirib. "Ümid edirəm ki, 2026-cı ildə vergi güzəştləri ilə birlikdə iqtisadiyyatın digər sahələri də bu inkişafa töhfə verəcək."

Bukvarın fikrincə, sərmayəçilər diqqəti müxtəlif sektorlara yönəltməli, yalnız SI sahəsinə bağlı qalmaqla riskə girməməlidirlər. O, kapital xərclərinin daha geniş miqyasda bölüşdürülməsinin vacibliyini vurğulayıb.

Tənzilə Ağabalayeva