ChatGPT-nin cavablarında mübahisəli mənbə ortaya çıxdı

Məlum olub ki, ChatGPT-nin bəzi cavablarında İlon Maskın “Grokipedia” adlı layihəsindən götürülmüş məlumatlar yer alır. Mühafizəkar meyilli, süni intellekt tərəfindən yaradılmış bu onlayn ensiklopediya Maskın “Wikipedia”nın mühafizəkar baxışlara qarşı qərəzli olduğunu iddia etməsindən sonra oktyabr ayında “xAI” tərəfindən istifadəyə verilib.

Valyuta.az xəbər verir ki, layihə elan edildikdən qısa müddət sonra bəzi maddələrin birbaşa “Wikipedia”dan köçürüldüyü aşkarlandı. Bununla yanaşı, “Grokipedia”da pornoqrafiyanın QİÇS böhranına töhfə verdiyi iddia olunub, köləlik üçün guya ideoloji əsaslar təqdim edilib və trans fərdlərlə bağlı alçaldıcı ifadələrə yer verilib. Bu məzmun ensiklopediyanın etibarlılığı ilə bağlı ciddi suallar yaradıb.

ChatGPT cavablarında "Grokipedia" izləri

Bu tip məzmunlar bir dövr özünü “Mecha Hitler” kimi təqdim etmiş və “X” platformasında cinsi məzmunlu deepfake-lərin yayılmasında istifadə edildiyi bilinən bir çatbotla əlaqələndirilən layihədən gözlənilən sayılırdı. Lakin mübahisə bununla bitməyib. “Grokipedia” məzmununun Mask ekosistemindən kənara çıxaraq ChatGPT cavablarında görünməyə başlaması müzakirəyə yeni ölçü qazandırıb.

“Guardian” qəzetinin xəbərinə görə, “GPT-5.2” ondan çox fərqli suala verdiyi cavablarda “Grokipedia”nı ümumilikdə doqquz dəfə mənbə kimi göstərib. Maraqlı məqam ondan ibarətdir ki, ChatGPT doğruluğu tez-tez şübhə altına alınan və yanlış məlumat ehtiva etdiyi bildirilən mövzularda bu mənbəyə istinad etməyib. 6 yanvar Konqres basqını və ya HİV/QİÇS epidemiyası kimi mövzularda “Grokipedia”ya yer verilməyib.

Bunun əvəzində, daha az tanınan mövzularda “Grokipedia”ya istinad edildiyi müşahidə olunub. Bunlar arasında “Guardian”ın daha əvvəl yanlış olduğunu ortaya qoyduğu, Sir Riçard Evans haqqında irəli sürülən iddialar da var. Oxşar şəkildə, “Anthropic” tərəfindən hazırlanmış “Claude” adlı süni intellekt modelinin də bəzi suallara cavab verərkən “Grokipedia”dan istifadə etdiyi görülüb.

"OpenAI"dan açıqlama

“OpenAI” tərəfindən “Guardian”a verilən açıqlamada bildirilib ki, ChatGPT ictimaiyyətə açıq olan, geniş mənbə və baxış bucaqları spektrindən yararlanmağı hədəfləyir. Bu yanaşma süni intellekt modellərinin hansı mənbələrdən istifadə etdiyi və həmin mənbələrin etibarlılığı məsələsini yenidən gündəmə gətirib.

“Grokipedia”nın ChatGPT cavablarında görünməsi təkcə texniki detal deyil. Bu hadisə eyni zamanda süni intellekt sistemlərinin informasiya ekosistemi ilə qurduğu əlaqənin nə qədər mürəkkəb və nəzarəti çətin olduğunu da göstərir. Qarşıdakı dövrdə bu mövzunun daha geniş müzakirələrə yol açacağı gözlənilir.

Paşa Məmmədli