ABŞ nüvə təhlükəsizliyi üçün "OpenAI"ın süni intellektindən istifadə edəcək

"OpenAI" şirkəti ABŞ-ın milli laboratoriyaları ilə süni intellekt (Al) modellərindən nüvə təhlükəsizliyi sahəsində istifadə olunmasını nəzərdə tutan bir razılaşma imzaladığını elan edib. 

Valyuta.az xəbər verir ki, bu barədə "Futurism" nəşri məlumat yayıb. 

"OpenAI"ın baş direktoru Sem Altmanın açıqlamasına görə, bu əməkdaşlıq nüvə müharibəsi riskinin azaldılması və nüvə materiallarının, silahlarının qlobal təhlükəsizliyinin təmin olunması məqsədini daşıyır.

Razılaşmaya əsasən, milli laboratoriyalarda çalışan 15 000-ə yaxın alim "OpenAI"ın ən yeni o1 seriyalı süni intellekt modellərinə çıxış əldə edəcək. Bununla belə, bu qərar birmənalı qarşılanmayıb, çünki "OpenAI"nın Al sistemləri daha əvvəl məxfi məlumat sızıntıları və yalan informasiya ilə bağlı problemlərlə üzləşib.

Bu tərəfdaşlıq, "OpenAI"ın ABŞ hökuməti ilə əməkdaşlığa artan marağı fonunda elan olunub. Şirkət bu həftə ABŞ dövlət qurumları üçün xüsusi hazırlanmış "ChatGPT Gov" platformasını təqdim edib və onun təhlükəsizlik baxımından gücləndirilmiş olduğunu vurğulayıb.

Buna baxmayaraq, bəzi mütəxəssislər "OpenAI"ın süni intellekt modellərinin nüvə təhlükəsizliyi sahəsində etibarlılığını və təhlükəsizliyini təmin edə biləcəyinə şübhə ilə yanaşır. Şirkətin əvvəlki məlumat sızmaları və səhvləri nəzərə alınaraq, bu sahədə Al-ın tətbiqi riskli addım kimi qiymətləndirilir.

Bununla yanaşı, "OpenAI"nın bazar dəyərinin iki dəfə artaraq 340 milyard dollar dəyərində qiymətləndirildiyi və yeni investisiya raundu üçün danışıqlar apardığı barədə məlumatlar yayılıb. Bundan başqa, "OpenAI"ın keçmiş prezident Donald Trampın "Stargate" adlı süni intellekt infrastrukturu layihəsində iştirak etməyə və gələn il ərzində bu sahəyə on milyardlarla dollar investisiya yatırmağa hazırlaşdığı bildirilir.

"OpenAI"nın süni intellekt modellərinin nüvə təhlükəsizliyi sahəsində effektivliyi hələ də sual altındadır, xüsusilə Tramp administrasiyası dövründəki tənzimləmə zəifləmələri fonunda. Bir çox mütəxəssis nüvə silahları üzərində nəzarətin, hətta qismən də olsa, qüsurları olan süni intellekt sistemlərinə həvalə edilməsinin təhlükəli bir addım olduğunu düşünür.

Paşa Məmmədli