10 məşhur şirkətin səhmləri 2026-cı ildə üstünlük təşkil edə bilər

2026-cı il ərzində hansı səhmlərin yüksəliş göstərəcəyini bilmək, əlbəttə ki, hər bir bazar investorunun əsas məqsədidir.

Haraya, nə vaxt və nəyə investisiya qoyulacağını bilmək investor üçün maliyyə uğursuzluğu ilə böyük sərvət arasındakı fərqi müəyyən edə bilər. Bu isə belə bir sual doğurur — 2026-cı ildə hansı məşhur şirkətlərin səhmləri bazarda üstünlük təşkil edəcək və investorlarına böyük gəlir gətirəcək?

2020-ci illərin dəyişən texnoloji mühitinə uyğun olaraq, bu şirkətlərin demək olar ki, hamısı texnologiya yönümlüdür və onların əksəriyyəti süni intellekt (AI) inkişafının ön sıralarında yer alır. Bu şirkətlər süni intellekt sahəsində gəlir əldə etməyə çalışdıqca, investorlar da məlumat mərkəzlərinin qurulması və AI inkişafının davamı ilə onların daha da zənginləşməsindən faydalanmağa ümid edirlər.

Analitiklərin əksəriyyətinin fikrincə, 2026-cı ildə uğur qazanacaq 10 şirkət bunlardır:

"Adobe"

"Adobe" şirkətinin bazar dəyəri 2025-ci ildə 20% azalsa da, "TipRanks" qeyd edir ki, şirkətin sabit gəlir bazası və texnologiya sektorundakı analoqları ilə müqayisədə daha aşağı qiymətləndirilməsi 2026-cı ildə daha güclü nəticələr üçün əsas amillər hesab olunur.

"Advanced Micro Devices"

"Advanced Micro Devices" (AMD) genişlənən CPU və AI sürətləndirici məhsul xətti sayəsində süni intellekt və məlumat mərkəzləri sahəsində "Nvidia"ya rəqib kimi getdikcə daha çox diqqət çəkir. "MarketBeat"ə görə, analitiklər 2026-cı ildə AMD-nin dəyərinin artacağına nikbin yanaşırlar.

"Alphabet"

Rəqəmsal reklam sahəsində üstün mövqeyi və süni intellektə artan investisiyaları (o cümlədən AI-nin "Google Search", "YouTube" və müxtəlif bulud xidmətlərinə inteqrasiyası) səbəbindən "Alphabet" şirkətinin 2026-cı ildə güclü nəticələr göstərməsi təəccüblü olmayacaq, "The Motley Fool" bildirir.

"Amazon"

"Disruption Banking and Investing"ə görə, nəhəng onlayn pərakəndə satıcı "Amazon"un böyüməsinin 2026-cı ildə də davam edəcəyi gözlənilir. Şirkətin AI və avtomatlaşdırmaya böyük sərmayələrinin il ərzində yüksək bazar göstəricilərinə səbəb olacağı proqnozlaşdırılır.

"Meta"

"Meta", müasir bazarlarda sabit inkişaf potensialına malik texnologiya şirkətləri qrupu — “Möhtəşəm Yeddilik” arasında yer alır. "Nasdaq"a görə, AI, reklam və uzunmüddətli “Metaverse” investisiyaları sayəsində şirkətin 2026-cı ildə güclü artım göstərəcəyi gözlənilir.

"Micron Technology"

Kompüter yaddaşı və məlumat saxlama şirkəti "Micron" son dövrlərdə AI yaddaşına artan tələbat sayəsində sürətli yüksəliş göstərir. "The Motley Fool"un məlumatına görə, rəqiblər (məsələn, "Samsung") yeni texnologiyalar təqdim etdikdə səhmlərdə qısamüddətli enişlər baş versə də, şirkətin gəlir artımı onu 2026-cı ilin sonuna qədər bazar liderlərindən birinə çevirə bilər.

"Nvidia"

"Yahoo Finance"ın məlumatına görə, "Nvidia" süni intellekt sahəsində dominant mövqeyə malikdir və onun qrafik prosessorları (GPU) müasir məlumat mərkəzlərinin əsasını təşkil edir. Analitiklər AI infrastrukturu və proqram təminatının genişlənməsi hesabına şirkətin gəlirlərinin və səhmlərinin artmağa davam edəcəyini gözləyirlər.

"SanDisk"

"SanDisk" şirkətinin səhmlərinin 2026-cı ildə yüksələcəyi gözlənilir. "Barchart"a görə, bu artım daha əlverişli qiymət şərtləri və yüksək performanslı fləş yaddaş texnologiyası ilə əlaqələndirilir.

"Visa"

"TipRanks" bildirir ki, "Visa"nın davamlı gəlir artımı, güclü pul axını və dividend/səhmlərin geri alınması proqramları şirkətin səhmlərinin 2026-cı ildə yüksəlməsinə səbəb ola bilər.

"Western Digital"

"Western Digital" hazırda süni intellekt iş yüklərinin artması fonunda diqqət mərkəzindədir. Bu tendensiya şirkətin tanındığı ənənəvi sərt disklərə və yaddaş həllərinə tələbatı artırır. "Business Insider"ın məlumatına görə, analitiklər şirkəti 2026-cı ilin qalan hissəsində potensial yüksəliş namizədi kimi qiymətləndirirlər.

Tənzilə Ağabalayeva