İlon Maskın süni intellekti "Grok" Donald Tramp və Mask haqqında məlumat verərkən gözlənilməz şəkildə cavab verməkdən imtina edib. Bəs bu hadisə necə və niyə baş verib?

Valyuta.az xəbər verir ki, İlon Maskın "ChatGPT"yə rəqib olaraq inkişaf etdirdiyi "Grok" "xAI"nin mühəndislik direktoru İqor Babuşkinin sözlərinə görə, müvəqqəti olaraq "İlon Mask-Donald Tramp haqqında mənbələr yanlış məlumat yayır" ifadəsinə cavab verməkdən imtina edib. 

"Grok" istifadəçiləri çatbotun bu mövzuya dair cavab verməməsi üçün yönləndirildiyini anlayandan sonra Babuşkin "Grok"un sistem təlimatlarını icazəsiz şəkildə yeniləyən keçmiş "OpenAI", yeni isə "Grok" əməkdaşını günahlandırıb.

X platformasında suallara cavab verən Babuşkin "Grok"un sistem təlimatının (bir süni intellektin sorğulara necə cavab verəcəyini müəyyən edən daxili qaydalar) açıq olduğunu bildirib. O, istifadəçilərin "Grok"a verilən sualları görməsinin vacib olduğunu düşündüklərini qeyd edib. 

Babuşkinin sözlərinə görə, bir əməkdaş bu sistem təlimatını dəyişib, çünki bunun faydalı olacağını düşünüb, lakin bu, onların dəyərləri ilə qətiyyən üst-üstə düşməyib.

Mask "Grok"u "maksimum həqiqət axtaran" və "kainatı anlamağı" missiya kimi qəbul edən bir süni intellekt kimi təsvir edir. "Grok-3" modelinin təqdimatından sonra çatbot Tramp, Mask və vitse-prezident Cey Di Vensin "Amerikaya ən çox zərər verən şəxslər" olduğunu bildirib. Maskın mühəndisləri, həmçinin "Grok"un "Mask və Trampın edamı haqlı olardı" deməsinin qarşısını almaq üçün müdaxilə etməyə məcbur qalıb.

Paşa Məmmədli