Zibillər daşınmır, uşaqlar oturmağa yer tapmır – İcra hakimiyyəti niyə tədbir görmür?

Bu gün Bakıda abadlaşan həyət və məhəllələrlə yanaşı, problemi bitib tükənməyən küçələr də yetərincədir.

Necə deyərlər göz və könül oxşayan məhəllələr sırasında, sanki bu həyətlər gözdən uzaq, könüldən iraq düşüblər.

Xətai rayonun Məhəmməd Hadi 58 ünvanında lentə aldığımız kadrlar onu deməyə əsas verir ki, sakinlər öz vəsaitləri hesabına yaşadıqları məhəlləni abadlaşdırmağa çalışırlar. Amma aidiyyəti icra orqanlarının yadına bu ünvan düşmür ki, düşmür.

Əslində gözdən uzaq məhəllə də deyil. Ukrayna dairəsinin yaxınlığında olan bu məhəllədə binanın giriş bloklarının qarşısındakı zibillər təmizlənmir, asfalt örtüyü dəyişilmir. Bundan başqa, bir neçə binanın çıxışı olan bu həyətdə toyuq, cücə də saxlanılır.

Zibil qablarının dəyişdirilməməsi isə bir ayrı zülmdür. Bunun üçün binanın sakinləri gün ərzində bir neçə dəfə zəng etməli, ev, uşaq, ailə qayğılarını unudub həyətin zibillikdən təmizlənməsi işi ilə məşğul olmalıdırlar.

Əslində Xətai rayonunda tikinti abadlıq işləri bəzi ünvanlarda, hətta Məhəmməd Hadi 58 ünvanına yaxın məhəllələrdə aparılır, amma bu həyətdə nə uşaqların oynaması üçün meydança var, nə də oturmağa oturacaq.

Suallarımıza cavab almaq məqsədi ilə əvvəlcə Xətai rayon İcra Hakimiyyətinin İctimai-siyasi və humanitar məsələlər şöbəsinin müdiri Pənah İmanovla telefon əlaqəsi saxladıq.

Pənah müəllim isə suallarımıza daha dəqiq və dolğun cavab veriləcək tək ünvanın 82 saylı Mənzil İstismar İdarəsi və Bakı Şəhər İcra Hakimiyyəti olacağını dedi.

Beləliklə çəkiliş qrupumuzla 82 saylı Mənzil İstismar İdarəsinin yerləşdiyi qonşu həyətə üz tutduq. Binanın işıqları söndüyündən idarədə yalnız mühasib xanım qarşıladı bizi, rəisin ərazidə olduğunu dedi. Zəng etdik, təxminən 15 dəqiqə gözlədikdən sonra Rəşad müəllimlə ayaqüstü də olsa görüşə bildik.

Suallarımızı şifahi olaraq cavablandıran idarə rəisi bildirdi ki, hazırda Xətai rayonunda Vətən Müharibəsi şəhidlərinin büstlərinin açılışları gündəmdə olduğundan, məhəllələrin abadlaşdırılmasına vaxt ayıra bilmirlər.

İdarə rəsmisi onu da əlavə etdi ki, Məhəmməd Hadi 58 ünvanı da Bakı Şəhər İcra Hakimiyyətinin tövsiyəsi ilə abadlaşdırılacaq, amma nə vaxt bunu deyə bilmirlər.

Problemi Bakı şəhər İcra Hakimiyyəti rəsmilərinin də diqqətinə çatdırdıq.

İcra Hakimiyyətindən bildirildi ki, Prezident İlham Əliyevin tapşırığına əsasən paytaxtda quruculuq işləri şəhərsalmanın müasir tələblərinə uyğunlaşdırılır. Məhəllələrdə "nümunəvi həyət"lərin salınması isə görülən işlərin tərkib hissəsidir.

O, ki qaldı, gözdən yox könüldən iraq olan Məhəmməd Hadi 58 ünvanındakı həyətin abadlaşdırılmasına, bununla bağlı Xətai Rayon İcra Hakimiyyəti qərar verib, əməli nəticə həyata keçirməlidir.

Gözləyək və inanaq ki, sözügedən ünvanın sakinləri də bu qayğıdan kənarda qalmayacaq.

Mənbə: APA TV

{gallery}