Uorren Baffetin ən uğurlu 5 investisiyası

Omahanın kahini kimi tanınan Warren Buffett uzun və zəngin investor karyerası ərzində saysız-hesabsız uğurlu qərarlara imza atıb. Bu yazıda onun investisiya tarixində xüsusi yer tutan beş ən uğurlu yatırımı diqqət mərkəzinə gətirilir.

Bu gün təxminən 150 milyard dollar sərvətə sahib olan Baffet təkcə dövrümüzün deyil, ümumilikdə tarixin ən varlı insanları sırasında yer alır. Bu səviyyə yalnız Rokfeller, Avqust Sezar və Çingiz xan kimi tarixi fiqurların çatdığı nadir bir zirvədir. Baffet bu mövqeyə əsasən ağıllı və uzunmüddətli investisiya qərarları sayəsində yüksəlib.

Hazırda trilyon dollarlıq Berkshire Hathaway şirkətinin rəhbərliyindən ayrılmağa hazırlaşan Baffet özü də etiraf edir ki, karyerası boyunca səhvləri olub. Lakin investisiya beysbol kimidir: mükəmməl olmaq yox, qazandıqlarının itirdiklərindən çox olması kifayətdir. Baffet də məhz bunu bacarıb.

Coca-Cola

Coca-Cola Uorren Baffetin ən sevdiyi və ən uzunmüddətli investisiyalarından biridir. O, zarafatla “səhmi, yoxsa içkini?” sualına “hər ikisi” cavabını verir. Berkshire Hathaway 1988-ci ildən etibarən Coca-Cola səhmlərinə sərmayə qoymağa başlayıb və ilkin olaraq 1,3 milyard dollar xərcləyib. Bu gün həmin payın dəyəri 28 milyard dolları aşır və şirkətin təxminən 9 faizindən çoxuna nəzarət edir. Coca-Cola güclü brend, bazarda qoruyucu üstünlüklər və stabil dividend ödənişləri ilə klassik “Baffet investisiyası” sayılır. Şirkət 63 ildir ardıcıl dividend artımı həyata keçirir və hazırkı ödənişlərə əsasən Baffet hər rüb 204 milyon dollar dividend gəliri əldə edir. Baffet zaman-zaman Coca-Cola ilə bağlı tənqidi mövqe də sərgiləyib. O, 1998-ci ildə səhmləri çox yüksək qiymətlə satmamasını səhv hesab etdiyini etiraf edib. Buna baxmayaraq, Coca-Cola Baffetin “ömürlük saxlanılacaq” səhmləri sırasındadır.

American Express

American Express də Coca-Cola kimi Baffetin daimi portfelində yer alan şirkətlərdəndir. Onun AmEx-ə ilk investisiyası hələ 1960-cı illərə təsadüf edir, əsas pay isə 1990-cı illərdə formalaşıb. Bu gün Berkshire Hathaway şirkətin təxminən 22 faizinə sahibdir və Baffet 1995-ci ildən bəri əlavə səhm almamasına baxmayaraq, payının dəyəri 50 milyard dolları ötüb. American Express güclü brendə, geniş bazar üstünlüklərinə və stabil dividend siyasətinə malikdir. Son on ildə dividend ödənişləri üç dəfədən çox artıb və 2025-ci ildə Baffetin bu investisiyadan əldə edəcəyi dividend gəlirinin 500 milyon dollara yaxınlaşacağı gözlənilir.

Apple

Apple Baffetin portfelində xüsusi yer tutur. Berkshire Hathaway Apple səhmlərini 2016-cı ildən almağa başlayıb və ümumilikdə 40 milyard dollar sərmayə yatırıb. Bir dövrdə Apple şirkətin səhm portfelinin təxminən yarısını təşkil edib. Baffet Apple-ı “dünyada tanıdığı ən yaxşı bizneslərdən biri” adlandırsa da, 2023–2025-ci illər arasında payının 70 faizdən çoxunu satıb. Təkcə 2024-cü ilin ikinci rübündə 80 milyard dollardan çox Apple səhmi satılıb. Satışın səbəbi şirkətin fəaliyyətindən çox, yüksək qiymətləndirmə və mümkün vergi dəyişiklikləri ilə bağlı olub. Buna baxmayaraq, Apple hələ də Berkshire Hathaway-in ən böyük investisiyası olaraq qalır.

GEICO

GEICO Baffetin təkrarolunmaz investisiyalarından biridir, çünki Berkshire bu şirkətə tam sahibdir. Baffet GEICO səhmlərini ilk dəfə 1951-ci ildə alıb, sonradan satıb, lakin şirkətin biznes modelinə heyran qalıb. 1976-cı ildən başlayaraq Baffet yenidən GEICO səhmlərini almağa başlayıb və 1995-ci ildə şirkətin 49 faizinə sahib olub. Daha sonra 2,3 milyard dollar ödəyərək qalan payları da alıb. Bu gün GEICO-nun aktivləri 32 milyard dolları ötür. Baffetin sözləri ilə desək: “Nemətlərimi sayanda GEICO-nu iki dəfə sayıram.”

Yapon ticarət şirkətləri

Baffetin son illərdə diqqət çəkən yatırımlarından biri də Yaponiyanın beş iri ticarət şirkətinə sərmayəsidir. Berkshire Hathaway bu şirkətlərə ümumilikdə 13,8 milyard dollar yatırıb və hazırda bu portfelin dəyəri 30 milyard dollara yaxınlaşır. Baffet bu investisiyaları uzunmüddətli hesab edir və gələcəkdə payların daha da artırılacağını istisna etmir. Onun sözlərinə görə, bu şirkətlər Apple və American Express kimi illərlə saxlanılacaq aktivlər sırasındadır.

Tənzilə Ağabalayeva