Mark Zukerberqin sərvəti artsa da, varlılar siyahısında geriləyib

Mark Zuckerberg son 15 aya yaxın dövrdə sərvətini 23 milyard dollar artırsa da, qlobal varlılar siyahısında ikinci yerdən altıncı yerə geriləyib.

Meta şirkətinin baş icraçı direktoru olan Zukerberq ötən ilin oktyabrında tarixində ilk dəfə dünyanın ikinci ən varlı şəxsi olmuşdu. Həmin vaxt o, Jeff Bezosu geridə qoymuşdu. Lakin Bloomberg Billionaires Index-in son göstəricilərinə əsasən, Zukerberqin xalis sərvəti 229 milyard dollara çatsa da, o hazırda altıncı pillədə qərarlaşıb.

2024-cü ilin oktyabrında Zukerberq yalnız  Elon Muskdan təxminən 50 milyard dollar geridə qalırdı. Lakin bu fərq son aylarda kəskin şəkildə artıb. Tesla və SpaceX-in rəhbəri olan Maskın sərvəti hazırda 632 milyard dollara yüksəlib və iki milyarder arasındakı fərq 400 milyard dollardan çoxdur.

Eyni dövrdə Alphabet-in həmtəsisçiləri Larry Page və Sergey Brin hər biri sərvətlərinə təxminən 100 milyard dollar əlavə ediblər. Nəticədə Peycin sərvəti 256 milyard dollara, Brinin sərvəti isə 238 milyard dollara çatıb. Bu artım Peyci yeddinci yerdən ikinci yerə, Brini isə onuncu yerdən dördüncü yerə yüksəldib.

Jeff Bezosun sərvəti də eyni müddətdə 39 milyard dollar artaraq 244 milyard dollara çatıb və o, üçüncü yerdə qərarlaşıb.

Larry Ellison, yəni Oracle-ın həmtəsisçisi isə ötən ilin oktyabrından bu yana 52 milyard dollar sərvət artımı ilə 231 milyard dollara yüksələrək beşinci pillədə yer alıb. O, sentyabr ayında qısa müddətə Maskı geridə qoyaraq dünyanın ən varlı şəxsi olmuşdu.

Oxşar vəziyyət Bernard Arnault üçün də keçərlidir. LVMH şirkətinin rəhbəri olan Arno sərvətini 11 milyard dollar artıraraq 204 milyard dollara çatdırsa da, dördüncü yerdən yeddinci yerə düşüb.

Texnologiya səhmləri reytinqləri dəyişdi

Zukerberqin ötən il ikinci yerə yüksəlməsindən sonra varlılar siyahısında baş verən dəyişikliklər əsasən iri texnologiya şirkətlərinin səhmlərinin dinamikası ilə bağlıdır. Bu müddətdə Tesla və Alphabet səhmləri müvafiq olaraq 94 faiz və 78 faiz bahalaşıb. Amazon səhmləri isə 22 faiz artıb. İnvestorlar bu şirkətlərin süni intellekt inqilabında aparıcı rol oynayacağına inanırlar.

Meta səhmləri isə eyni dövrdə cəmi 11 faiz yüksəlib. Oracle səhmləri 7 faiz, LVMH isə 2 faizdən az artım göstərib.

Bundan əlavə, SpaceX-in yaxın zamanda keçirilən ikinci bazar səhm satışı əsasında şirkətin dəyərinin 800 milyard dollar səviyyəsinə yüksəlməsi, Elon Maskın sərvətinin kəskin artmasına səbəb olub.

Nəticədə, Zukerberq əhəmiyyətli sərvət artımına baxmayaraq reytinqdə geriləyib. Lakin siyahının tez-tez dəyişdiyini və onun ikinci yerdə qərarlaşan Larri Peycdən cəmi 27 milyard dollar geridə qaldığını nəzərə alsaq, bu mövqenin uzunmüddətli olmayacağı istisna edilmir.

Tənzilə Ağabalayeva