"İpək Yolu" qastronomiyası ilə qlobal brend yaratdı - SƏHƏR OXUSU

ABŞ-da halal qida sektorunun aparıcı brendlərindən biri olan “Saffron Road”un qurucusu Adnan Durani son illərdə təkcə qida sənayesində deyil, həm də mədəni müxtəlifliyin iqtisadi dəyərə çevrilməsi baxımından maraqlı nümunə kimi tanınır.

Valyuta.az xəbər verir ki, onun qurduğu model qədim İpək Yolunun mədəniyyətlərarası əlaqələrini bu gün supermarket rəflərində davam etdirən müasir bir qida strategiyasıdır.

Durani 2010-cu ildə təxminən 500 min dollar şəxsi vəsaitlə “American Halal Co.” şirkətini qurdu. Məqsədi Yaxın Şərq, Asiya və Aralıq dənizi mətbəxlərini Qərb istehlakçısına təqdim etmək idi. O, bu mətbəxlərin birləşdiyi və tarixən xalqları əlaqələndirən “İpək Yolu qastronomiyası” anlayışını brend fəlsəfəsinin mərkəzinə çevirib. Qidanı yalnız məhsul deyil, həm də mədəniyyət daşıyıcısı kimi təqdim edərək, müxtəlifliyin iqtisadi gücünü nümayiş etdirib.

“Halal” konsepsiyasını yalnız dini deyil, etik və sağlamlıq yönümlü anlayış kimi təqdim edən “Saffron Road”, bazarda ilk “non-GMO Project Verified” halal brendi kimi fərqləndi. GMO-suz, antibiotiksiz və insani şəkildə yetişdirilən məhsullar brendi daha geniş auditoriyaya çıxardı.

2011–2014-cü illərdə şirkət satışlarını 713% artıraraq, Inc. 5000 siyahısında ABŞ-ın ən sürətlə böyüyən şirkətləri sırasına daxil olub. Bu nəticə 3 dəfə təkrar edilib. 2020-ci ildə “Saffron Road”un illik satış dövriyyəsi 51 milyon dollara çatıb. Hazırkı hədəf – bu rəqəmi 100 milyon dollara yüksəltməkdir.

Brendin Walmart strategiyası da uğur nümunəsidir. 2015-ci ildə uğursuz cəhdlə şəbəkədən çıxarılan “Saffron Road” 2019-cu ildə geri dönərək 4300 mağazada yer aldı və 2020–2021-ci illərdə satışlarını 143% artırdı. Walmart daxilində ilk üç ən uğurlu təchizatçılardan birinə çevrildi.

Bu genişlənməni təmin etmək üçün şirkət 2018–2019-cu illərdə 12,2 milyon dollar, ümumilikdə isə 20,1 milyon dollar investisiya cəlb edib. Bu vəsait əsasən marketinq, məhsul genişlənməsi və distribütor şəbəkələrinin inkişafına yönəlib.

“Saffron Road” sosial məsuliyyət sahəsində də fərqlənir. B-Corp sertifikatı ilə təsdiqlənmiş şirkət ekoloji və etik prinsiplərə sadiq qalır. Ramazan aylarında satışların 300% artması, brendin müsəlman auditoriya ilə möhkəm əlaqə qurduğunu göstərir.

Adnan Duraninin qurduğu model, bir niş bazardan çıxaraq, strateji planlama və dəyər yönümlü yanaşma ilə milyonlarla dollar dövriyyəsi olan qlobal brend yaratmağın real nümunəsidir.

Mayya Hüseynova