Azərbaycanda 5 səhmdar cəmiyyətin səhmləri satışa çıxarılır

Əmlak Məsələləri Dövlət Xidmətinin təşkilatçılığı ilə 13 yanvar tarixində təkrar pul hərracı keçiriləcək. Hərracda dövlətə məxsus səhmlərin satışa çıxarılması planlaşdırılır. Ümumilikdə beş səhmdar cəmiyyətinin səhmləri satışa təqdim olunacaq.

Valyuta.az xəbər verir ki, hərraca çıxarılan səhmdar cəmiyyətlər "Salyan broyler", "Yevlax Yük Avtonəqliyyat", "Yevlax Kəndnəqliyyat", "Şıxlar Broyler", "Xaçmaz Mexanizasiya Nəqliyyat"dır.

"Salyan broyler" ASC 2000-ci ildə yaradılıb və onun balansında 1 120 118 manat nizamnamə kapitalı mövcuddur. Səhmdar cəmiyyətin 560 059 ədəd buraxılmış səhminin 30,04 faizini təşkil edən 168 225 ədəd səhmi satışa çıxarılıb. Bir səhmin nominal dəyəri 2 manat olmaqla, ümumi nominal dəyər 336 450 manat, ilkin satış qiyməti isə 168 225 manat müəyyən edilib. Hərracda iştirak etmək üçün tələb olunan beh məbləği 16 822 manatdır.

"Yevlax Yük Avtonəqliyyat" ASC 1998-ci ildə təsis edilib və Yevlax şəhərində yerləşir. 158 443 ədəd buraxılmış səhmin 30,01 faizini təşkil edən 47 543 səhmi satışa çıxarılıb. Bu səhmlərin nominal dəyəri 95 086 manat, ilkin satış qiyməti isə 47 543 manat təşkil edir. Beh məbləği 4 754 manatdır.

1997-ci ildə yaradılmış "Yevlax Kəndnəqliyyat" ASC-nin isə 112 950 ədəd səhminin 30,02 faizini təşkil edən 33 906 səhmi satışa çıxarılıb. Nominal dəyəri 67 812 manat olan bu səhmlər ilkin olaraq 33 906 manata təklif olunur. Beh məbləği isə 3 390 manatdır.

"Şıxlar Broyler"ASC 1998-ci ildə yaradılıb. 139 804 ədəd buraxılmış səhmin 30,11 faizini təşkil edən 420 90 səhmi satışa çıxarılıb. Bu səhimlərin nominal dəyəri 84 180 manat, ilkin satış qiyməti isə 42 090 manat təşkil edir. Beh məbləği 4 209 manatdır. 

"Xaçmaz Mexanizasiya Nəqliyyat" ASC 2005-ci ildə yaradılıb. 61 528 ədəd buraxılmış səhmin 30,01 faizini təşkil edən 18 463 səhmi satışa çıxarılıb. Bu səhmlərin nominal dəyəri 36 926 manat, ilkin satış qiyməti isə 18 463 manat təşkil edir. Beh məbləği 1 846 manatdır.

Hərracda iştirak etmək istəyən hüquqi və fiziki şəxslər sifarişlərini və tələb olunan digər sənədləri ən geci hərracın keçirilməsinə 3 bank günü qalanadək Əmlak Xidmətləri Məkanına (ünvan: Bakı şəhəri, Nizami rayonu, Xəlil Rza Ulutürk küçəsi, 20) və ya İqtisadiyyat Nazirliyinin Elektron Xidmətlər Portalı vasitəsilə təqdim etməlidirlər.

Tənzilə Ağabalayeva